Shavkat Mirziyoyevning 2021-yil 6-martida Urush va mehnat faxriylari uchun respublika pansionatiga tashrifi vaqtida davlat rahbari bilan uchrashgan onaxon — Mapura Mirmag‘rupova hayoti davomida boshidan o‘tkazganlari va Prezident bilan suhbati haqida hikoya qilib, uni o‘z o‘g‘lidek ko‘rishini so‘zlab berdi.
“Eshikdan kirib kelganlarida boshqacha bo‘lib ketdilar. Shunaqa tabassum bilan, Prezident emas, o‘g‘ildek kirib keldilar. Mehr paydo bo‘ldi o‘rtada”, — deya gap boshlaydi onaxon.
Uning so‘zlariga ko‘ra, ayol 50 yil davomida buxgalter bo‘lib ishlagan. Maktab direktori bo‘lgan otasi oiladagi 4 o‘g‘il va 4 qizning hammasini o‘qitgan. Turmush o‘rtog‘i 1999-yilda vafot etgan. Yolg‘izgina o‘g‘li ham 29 yoshida olamdan o‘tgan. O‘g‘lidan qolgan yogdorlik bo‘lgan nabirasini 8 oydan keyin kelin olib ketib qolgan va boshqaga turmushga chiqqan. Aka-singillarinikiga borib yashashni o‘ziga noqulay deb bilgan onaxon shu yerga kelib, yoqtirib qolgan. “Uyimdan ham aziz, hamma sharoitlar yaratilgan, hamma narsa bor, tayyor”, — deydi u.
Uning aytishicha, uy olishga ham harakat qilgan, ammo uy borasida va’da bergan kishi pulini ham olib ketib, qaytib kelmagan.
“Har kuni kechqurun o‘tirib yig‘lardim. Birov bolang bormi desa, ‘ha, 3-4 ta’, deb aytaverardim, lekin ichim yig‘lardi. O‘zimcha yashay olmasdim. Birovni ko‘rsam ham o‘g‘lim derdim.
Prezident bolam, har doim ko‘z oldimdalar. Rasmlari uyimda bor, ko‘rib qarab o‘tiraman, gaplashaman. ‘Bolamni, ehtiyot qilgin, bu koronavirus-ku, maska taqmaydi, yuqib qoladi’ deb o‘zim bilan o‘zim gaplashib o‘tiraman. Rasmda yaxshi edi — Mustaqillikning 30 yilligini o‘tqazaman, Yangi O‘zbekiston quraman deb ozib ketdilar. Odam o‘ziga ham ozgina qarashi kerak, dam olishi kerak. Ilohim umrlari uzoq bo‘lsin, tan-u jonlari sog‘ bo‘lsin. Juda baxtliman bolam deyishga. Eng baxtli ona menman, nega deganda meni bolam bor”, — deydi onaxon.
Izoh (0)