Tashqi mehnat migratsiyasi agentligi Rossiyadagi bir guruh O‘zbekiston fuqarolarining yo‘llagan murojaati yuzasidan ma’lumot berdi.
Ijtimoiy tarmoqlarda Rossiyaning Perm shahridagi qurilish obyektlarida ishlash uchun kelgan bir guruh o‘zbekistonlik mehnat migrantlarining va’da qilingan oylik maoshlari berilmayotgani, qishki maxsus kiyimlar bilan ta’minlanmagani haqida murojaati tarqalgan.
O‘zbekiston va Rossiya hukumatlari o‘rtasida 2017-yil 5-apreldagi “Rossiya hududida vaqtinchalik mehnat faoliyatini amalga oshirish uchun O‘zbekiston Respublikasi fuqarolarini tashkiliy asosda qabul qilish va jalb etish to‘g‘risida”gi bitim ijrosini ta’minlash, fuqarolarni xorijiy davlatlarda munosib ish o‘rinlariga jalb qilish maqsadida 2021-yilning 21-may kuni Rossiyaning Resurs+ MChJ va Bandlik va mehnat munosabatlari vazirligi huzuridagi Tashqi mehnat migratsiyasi agentligi o‘rtasida hamkorlik shartnomasi imzolangan.
Ushbu kelishuvga muvofiq, iyun-avgust oylarida Andijon (8), Namangan (4), Farg‘ona (351) va Qashqadaryo (47) viloyatlaridan 410 nafar fuqaro tashkillashtirilgan tartibda Perm o‘lkasiga vaqtinchalik mehnat faoliyatini amalga oshirish uchun yuborilgan.
Ta’kidlanishicha, ushbu fuqarolarning Rossiyaga borish bilan bog‘liq transport xarajatlari “Resurs+” korxonasi hisobidan qoplangan.
“Biroq ishlash uchun yuborilgan fuqarolarning 47 nafari mehnat shartnomasida belgilangan majburiyatlarini buzib, mehnat shartnomasi talablariga rioya etmagan. Xususan, spirtli ichimliklarni ish joyida iste’mol qilish kabi holatlar muntazam kuzatilgani sababli, ushbu mehnat migrantlari bilan mehnat shartnomalari muddatdan oldin bekor qilinib, O‘zbekistonga qaytarilgan”, — deyiladi xabarda.
Avvalroq Rossiyaning Primorsk o‘lkasida ish beruvchi tomonidan pasportlari olib qo‘yilgan o‘zbekistonliklarga yordam berilgani, Senat Rossiyaga ishlash uchun ketgan o‘zbekistonliklarning videomurojaati yuzasidan o‘rganish natijalarini e’lon qilgani, Rossiyada bo‘lib turgan o‘zbekistonliklar ommaviy mushtlashuv bilan bog‘liq holatlar ko‘paygani sabab ogohlikka chaqirilgani hamda Rossiyada ikki oyog‘idan ayrilib, xotirasini qisman yo‘qotgan ayol O‘zbekistonga qaytarilgani to‘g‘risida xabar berilgandi.
Izoh (0)