Farg‘ona shahrida 2007-yilda qotillik va o‘g‘rilik jinoyatlarini sodir etgan shaxsga 2021-yilda sud hukmi o‘qildi. Bu haqda “Daryo”ga viloyat sudi xabar bermoqda.
Ma’lum bo‘lishicha, 1975-yilda tug‘ilgan, muqaddam ikki marotaba sudlangan, Farg‘ona shahrida yashovchi Ahror Ramatov (barcha ism-shariflar o‘zgartirilgan) 2007-yilning 4-noyabr kuni soat 19:30 da mast holda ketayotib, ko‘chada mahalladoshi 1983-yilda tug‘ilgan Mardon Topvoldiyevni ko‘rib qolgan. Uchrashuv davomida Ahror yengil tabiatli ayollar bilan “dam olish”ni taklif qilgan.Mardon rozi bo‘lgach, ikkovlon “yengil tabiatli” ayollar turadigan joyga kelib, marhuma Maftuna Hosilova hamda To‘lqinoy Parmonova bilan tanishib, dam olib o‘tirishga kelishib, Maftunaning uyiga borgan. Uyda o‘zlari bilan olib kelgan spirtli ichimliklarni iste’mol qilgach, soat 23:00 larda To‘lqinoy Parmonova uyiga ketgan. Shundan so‘ng Ahror uy egasi bilan o‘zaro janjallashib qolgan. Janjal davomida Maftunaning uyatli so‘zlar bilan haqorat qilganidan g‘azablangan Ahror xonada turgan DVD apparatining elektr simi bilan ayolning bo‘ynidan bo‘g‘gan. Oqibatda ayol hushini yo‘qotgan.
Shundan so‘ng Ahror uy egasini o‘lgan deb hisoblab, jinoyatga guvoh bo‘lgan Mardonga bo‘lgan voqea haqida hech kimga aytmaslikni uqtirib, xonadonda bo‘lgan “Konedak” nomli DVD va Siemens nomli telefonni yashirin ravishda olib chiqib ketgan.
Ko‘rsatilgan tibbiy muolajalarga qaramasdan Maftuna Hosilova olgan tan jarohati natijasida 2007-yilning 5-noyabr kuni shifoxonada vafot etgan.
“Ushbu voqeadan so‘ng Mardon bilan uyga qaytdik. O‘g‘irlangan narsalarni uyga olib kirishdan qo‘rqib, yonimizdagi ariq yon tomoniga ko‘mib qo‘ydim. Oradan besh-olti kun o‘tgach, Rossiyaga ketdim. U yerda olti oy ishlab qaytib kelib, ko‘mib qo‘yilgan apparatlarni qaraganimda joyida turgan ekan. Ishlatmoqchi bo‘ldim, ammo qo‘rqdim. Bundan tashqari eskirib, zanglab ketgan edi, bo‘laklarga bo‘lib, lo‘lilarga sotdim. Hech kim shubhalanmaganligi uchun voqeani hammadan sir saqladim. Sherigimga ham tiliga mahkam bo‘lmasa, yomon bo‘lishini bildirib, ogohlantirganim uchun jim yurdi. Aslida uni o‘ldirish niyatim bo‘lmagan. Faqat u nafsoniyatimga teggani uchun o‘zimni tutib turolmadim. Qilgan ishlarimdan pushaymonman”, — deydi sudda so‘z olgan sudlanuvchi.
Sud ish hujjatlarini ko‘rib chiqib, Ahror Ramatovni Jinoyat kodeksining 97-moddasi 1-qismi (qasddan odam o‘ldirish) va 169-moddasi (o‘g‘rilik) bilan ayblab, unga nisbatan 11 yil muddatga ozodlikdan mahrum qilish jazosini tayinlagan. Biroq sud hay’ati, Oliy Majlis Senatining 2007-yil 30-noyabrdagi, 2012-yil 5-dekabrdagi, 2013-yil 12-dekabrdagi, 2014-yil 14-noyabrdagi qarorlarida ko‘rsatilgan tegishli bandlarni qo‘llab, o‘talmay qolgan jazo muddatini to‘rtdan bir qismiga qisqartirishni lozim deb topgan.
Izoh (0)