Шавкат Мирзиёевнинг 2021 йил 6 мартида Уруш ва меҳнат фахрийлари учун республика пансионатига ташрифи вақтида давлат раҳбари билан учрашган онахон — Мапура Мирмағрупова ҳаёти давомида бошидан ўтказганлари ва Президент билан суҳбати ҳақида ҳикоя қилиб, уни ўз ўғлидек кўришини сўзлаб берди.
«Эшикдан кириб келганларида бошқача бўлиб кетдилар. Шунақа табассум билан, Президент эмас, ўғилдек кириб келдилар. Меҳр пайдо бўлди ўртада», — дея гап бошлайди онахон.
Унинг сўзларига кўра, аёл 50 йил давомида бухгалтер бўлиб ишлаган. Мактаб директори бўлган отаси оиладаги 4 ўғил ва 4 қизнинг ҳаммасини ўқитган. Турмуш ўртоғи 1999 йилда вафот этган. Ёлғизгина ўғли ҳам 29 ёшида оламдан ўтган. Ўғлидан қолган ёгдорлик бўлган набирасини 8 ойдан кейин келин олиб кетиб қолган ва бошқага турмушга чиққан. Ака-сингиллариникига бориб яшашни ўзига ноқулай деб билган онахон шу ерга келиб, ёқтириб қолган. «Уйимдан ҳам азиз, ҳамма шароитлар яратилган, ҳамма нарса бор, тайёр», — дейди у.
Унинг айтишича, уй олишга ҳам ҳаракат қилган, аммо уй борасида ваъда берган киши пулини ҳам олиб кетиб, қайтиб келмаган.
«Ҳар куни кечқурун ўтириб йиғлардим. Биров боланг борми деса, ‘ҳа, 3-4 та’, деб айтаверардим, лекин ичим йиғларди. Ўзимча яшай олмасдим. Бировни кўрсам ҳам ўғлим дердим.
Президент болам, ҳар доим кўз олдимдалар. Расмлари уйимда бор, кўриб қараб ўтираман, гаплашаман. ‘Боламни, эҳтиёт қилгин, бу коронавирус-ку, маска тақмайди, юқиб қолади’ деб ўзим билан ўзим гаплашиб ўтираман. Расмда яхши эди — Мустақилликнинг 30 йиллигини ўтқазаман, Янги Ўзбекистон қураман деб озиб кетдилар. Одам ўзига ҳам озгина қараши керак, дам олиши керак. Илоҳим умрлари узоқ бўлсин, тан-у жонлари соғ бўлсин. Жуда бахтлиман болам дейишга. Энг бахтли она менман, нега деганда мени болам бор», — дейди онахон.
Изоҳ (0)