Туркманистон президенти Гурбангули Бердимуҳамедовнинг аҳволи ёмонлашгани ҳақидаги хабарлар ҳақиқатга тўғри келмайди, у тадбирларда иштирок этмоқда. Бу ҳақда «РБК»га Туркманистоннинг Россиядаги элчихонаси матбуот хизмати маълум қилди.
«Бир қатор ОАВларнинг, гўёки, Туркманистон президентининг аҳволи ёмонлашгани ҳақидаги хабарлари мутлақо ишончсиз ва ҳақиқатга тўғри келмайди», — дейишди матбуот хизматида.
Дипломатик миссия қайд этишича, мамлакат президенти тадбирларда мунтазам иштирок этмоқда, уларнинг жадвали эса президент сайтига жойлаштирилган. Хусусан, 20 сентябрь куни Бердимуҳамедов онлайн-форматда Вазирлар Маҳкамаси йиғилишини ўтказган, — дейилади элчихона хабарида.
Аввалроқ «РИА Новости» номи келтирилмаган ОАВларга таяниб, Бердимуҳамедов кома ҳолатида ётганини маълум қилганди.
Шундан кейин бу янгилик бошқа йирик Россия ОАВларида тарқалиб кетди. Улардан ҳеч бирида президентнинг комага тушгани ҳақидаги миш-мишларнинг асл манбаси келтирилмаган.
«Хроника Туркменистана» таъкидлашича, Бердимуҳамедов комада ётгани ҳақидаги илк миш-мишлар туркманистонлик мухолифатчи блогер Мухаммет Дуежининг YouTube каналида пайдо бўлган. Тегишли ролик каналга 21 сентябрь куни тонгги вақтда жойланган.
Нашр эслатишича, сўнгги марта Туркманистон раҳбари 20 сентябрь куни, Вазирлар маҳкамасининг мамлакат мустақиллигининг 30 йиллигини нишонлашга тайёргарлик кўришга бағишланган кенгайтирилган йиғилиши чоғида телекамералар объективлари қаршисида кўринган.
Эслатиб ўтамиз, 2019 йил июлида баъзи ОАВлар ва Telegram каналлар аноним манбаларга таяниб, Бердимуҳамедовнинг ўлими ҳақида маълум қилган эди. Ўшанда Туркманистон элчихонаси хабарларни рад этиб, уларни «ғирт ёлғон» деб атаган, президент эса яна омма олдига чиқишда давом этган эди. Кейинроқ мамлакат сиёсий доираларидаги манба Бердимуҳамедов касал онасидан хабар олгани Германияга кетгани сабабли оммага кўриниш бермаётганини маълум қилганди.
Бердимуҳамедов 64 ёшда, у 2007 йил февралида Туркманистон президентига айланган.
Аввалроқ Туркманистон президенти Гурбангули Бердимуҳамедов яқин кунларда расмий ташриф билан Ўзбекистонга келиши кутилаётгани хабар берилган эди.
Мавзуга доир:
- Бердимуҳамедов Туркманистонда коронавирус борлигини ҳалигача инкор этмоқда, аммо эпидемиологик хавфсизликка жавобгар вазирларни ишдан бўшатди
- Туркманистон президенти тилла белкурак, тилла арава ва тилла капсула билан янги саноат мажмуаси қурилишини бошлаб берди (видео)
- Бердимуҳамедов Туркманистон тарихидаги биринчи Олимпиада медали совриндорига квартира ва машина совға қилди
- Гурбангули Бердимуҳамедов ўғли билан бирга «Аваза»даги спортзалга борди (фото)
Изоҳ (0)