2021-yil sentabr holatiga ko‘ra, Yaponiyada keksalar ulushi mamlakat aholisining 29,1 foizini tashkil etmoqda, bu Yaponiya tarixidagi rekord ko‘rsatkich, deb yozadi Mainichi nashri milliy hukumat ma’lumotlariga asoslanib.
2020-yil yakunida Yaponiyada keksalar ishlaydigan fuqarolarining 13,6 foizini tashkil qilardi. Nashr ushbu natijalarni “jamiyat tez qarib borayotganiga yana bir isbot” deya ta’rifladi. Yaponiyada 65 va undan katta yoshdagi fuqarolar qariya hisoblanadi. Sentabr oyida ularning soni 36,4 million kishini tashkil etdi, bu 2020-yilga nisbatan 220 ming kishiga ko‘p.
Ma’lumotlar Ichki ishlar va aloqa vazirligi tomonidan Keksalar kuniga bag‘ishlab taqdim etildi. Vazirlikka ko‘ra, Yaponiya aholisining qarishi bo‘yicha jahon rekordini o‘rnatgan. Ikkinchi o‘rinda keksalar ulushining 23,6 foizi bilan Italiya, uchinchi o‘rinda 23,1 foiz bilan Portugaliya turibdi.
Yaponiyada 65 va undan katta yoshdagi 15,83 million erkak va 20,57 million ayol istiqomat qiladi. 2020-yil yakunida ishlaydigan 9,06 million yaponiyalik keksa aholining 5,39 million nafari erkaklar edi.
Mamlakatda 80 va undan yuqori yoshdagi odamlar soni 12,06 millionni tashkil etadi, bu o‘tgan yilga nisbatan 460 ming kishiga ko‘p. 90 va undan katta yoshdagilar soni 25,9 millionga yetgan, shu jumladan uzoq umr ko‘ruvchilar 80 ming kishini tashkil qilmoqda. Yaponiya Aholi va farovonligini tadqiq qilish milliy instituti prognozlariga ko‘ra, 2025-yilga borib qariyalar Yaponiya aholisining 30 foizini, 2040-yilga kelib esa 35,3 foizini tashkil qiladi.
Iqtisodiy hamkorlik va taraqqiyot tashkiloti ma’lumotlariga ko‘ra, 2020-yilga kelib Yaponiya qariyalarning bandligi bo‘yicha dunyoda ikkinchi o‘rinni egallagan. Tashkilot hisob-kitoblariga ko‘ra, o‘sha paytda mamlakatda 65 yosh va undan katta fuqarolarning 25,1 foizi ishlar edi. Bu ko‘rsatkich yetakchi mamlakat Janubiy Koreyada 34,1 foizni, AQSh va Kanadada esa 18 va 12,8 foizni tashkil etgan.
Izoh (0)