Braziliya prezidenti Jair Bolsonaru emlanganik sertifikati yo‘qligi sababli Nyu-Yorkdagi restoranlarga kiritilmadi. Bu haqda Reuters xabar berdi.
Braziliya delegatsiyasidan Vazirlar Mahkamasining ikki amaldori ijtimoiy tarmoqqa joylashtirgan fotosuratda Braziliya prezidenti o‘zi joylashgan “Manxetten” mehmonxonasi tashqarisidagi yo‘lning o‘rtasida pitssa yeb turganini ko‘rish mumkin.
Shu hafta Nyu-Yorkda Birlashgan Millatlar Tashkiloti (BMT) Bosh Assambleyasining uchrashuvi bo‘lib o‘tmoqda. Assambleya doirasida tashkil etilgan birinchi oqshomda ishtirok etgan Bolsonaruning tarafdorlari Braziliya rahbaridagi “oddiylik”ni yuqori baholadi. Keyinchalik Nyu-Yorkdagi an’anaviy Braziliya taomlari restorani piyodalar yo‘lagining bir qismini to‘sib qo‘yishga majbur bo‘ldi, u yerda mehmonlar uchun, ayniqsa Bolsonaru va unga hamroh bo‘lganlar uchun dasturxon yozildi.
Tashkilot ma’muriyati Braziliya prezidenti uchun tashqaridan joy qilishga majbur bo‘ldi, chunki Nyu-Yorkda amaldagi sanitariya qoidalari COVID-19 vaksinasini olmagan odamlarga kafe, restoran va boshqa ovqatlanish shoxobchalariga kirishga ruxsat bermaydi.
O‘tgan hafta Bosh Assambleya raisi Abdulla Shahid BMTga a’zo 193 davlatning prezidentlari, bosh vazirlari va diplomatlari uchun ham tashkilotning COVID-19 ga qarshi vaksinatsiya tizimi amalda qolishi haqida xabar bergandi. Ulardan emlanganlik haqida dalil ko‘rsatish talab qilinmaydi. Shunga qaramay, Nyu-York meri Bill de Blazio dunyo mamlakatlari rahbarlaridan BMT yig‘ilishida qatnashishdan oldin emlanishni so‘ragan.
Uchrashuvda Buyuk Britaniya bosh vaziri Boris Jonsonning emlanganmisiz yoki yo‘qmi, degan savoliga Bolsonaru: “Yo‘q, hali”, deb javob berdi.
Ta’kidlash joizki, Braziliya prezidenti pandemiya boshidanoq niqob taqishdan bosh tortib, izolyatsiya choralarini qo‘llashga qarshi bo‘lgan va bir necha bor mutaxassislarning chaqiruvlarini e’tiborsiz qoldirgan. Shuningdek, u virus tarqalayotganiga qaramay, chet elliklarning mamlakatga kirishiga ruxsat bergan.
May oyida Braziliyaning Maranyan shtati hukumati Bolsonaruni Asaylandiya shahriga tashrifi chog‘ida aksiya uchun odamlarni to‘plagani, ammo o‘zi bu vaqtda niqobsiz holda bo‘lgani uchun jarimaga tortgan.
Izoh (0)