Sudanda bir guruh harbiylar hukumat obyektlarini o‘z nazorati ostiga olishga va davlat to‘ntarishi uyushtirishga urindi. Bu haqda Al-Arabiya xabar berdi. Harbiy to‘ntarishga urinish holatini Al-Jazeera ham tasdiqladi, deb yozadi “RBK”.
Reuters mamlakat hukumat kengashidagi manbasiga tayanib ma’lum qilishicha, ayni paytda hukumat vaziyatni o‘z nazorati ostida ushlab turibdi.
Davlat telekanallari namoyish qilayotgan lavhalarda Sudan poytaxti — Xartum ko‘chalarida tanklar harakatlanayotganini ko‘rish mumkin. Bundan tashqari, Al-Jazeera qayd etishicha, davlat telekanallari orqali vatanparvarlik qo‘shiqlari va kliplari uzatilmoqda.
Al-Arabiya yozishicha, general-mayor Abdulbaki Bakraviy rahbarligidagi 20 dan ortiq yuqori mansabli ofitserlar Sudan armiyasining zirhli tank korpusini o‘z nazorati ostiga olgan, shundan so‘ng bir nechta davlat OAVlari, shu jumladan, Omdurman radiosi idoralarini egallab olishga uringan. Sudanni boshqaruvchi harbiy kengashdagi manbalarga ko‘ra, ayni paytda isyonning barcha ishtirokchilari hibsga olingan.
2019-yil aprelida Sudanda davlat to‘ntarishi oqibatida 1993-yildan buyon prezidentlik qilib kelayotgan Umar al-Bashir hokimiyatdan chetlatilgan va hibsga olingan edi. Hokimiyat Harbiy kengash qo‘liga o‘tgandi. May oyida harbiylar va muxtoriyat mamlakatda uch yil muddatga o‘tish davrini joriy qilishga kelishib oldi. Biroq muxolifat ish tashlashni boshlab, hukumatni tezroq shakllantirishga da’vat etdi. Mamlakatda tartibsizliklar davom etaverdi.
2019-yil dekabrida Umar al-Bashir korrupsiya va chet el valyutasiga noqonuniy egalik qilgani uchun ikki yil muddatga axloq tuzatish koloniyasiga mahkum qilindi. U hokimiyatdan tushirilgach, uyidan 130 million dollar pul solingan jomadonlar topilgan.
Bugungi harbiy isyon uyushtirishga urinish al-Bashir prezidentligidan keyin Sudanda yuz bergan birinchisi emas. 2020-yil yanvarida mamlakatda hokimiyatni egallab olishga razvedka ofitserlari urinib ko‘rgan edi.
Izoh (0)