Суданда бир гуруҳ ҳарбийлар ҳукумат объектларини ўз назорати остига олишга ва давлат тўнтариши уюштиришга уринди. Бу ҳақда Al-Arabiya хабар берди. Ҳарбий тўнтаришга уриниш ҳолатини Al-Jazeera ҳам тасдиқлади, деб ёзади «РБК».
Reuters мамлакат ҳукумат кенгашидаги манбасига таяниб маълум қилишича, айни пайтда ҳукумат вазиятни ўз назорати остида ушлаб турибди.
Давлат телеканаллари намойиш қилаётган лавҳаларда Судан пойтахти — Хартум кўчаларида танклар ҳаракатланаётганини кўриш мумкин. Бундан ташқари, Al-Jazeera қайд этишича, давлат телеканаллари орқали ватанпарварлик қўшиқлари ва клиплари узатилмоқда.
Al-Arabiya ёзишича, генерал майор Абдулбаки Бакравий раҳбарлигидаги 20 дан ортиқ юқори мансабли офицерлар Судан армиясининг зирҳли танк корпусини ўз назорати остига олган, шундан сўнг бир нечта давлат ОАВлари, шу жумладан, Омдурман радиоси идораларини эгаллаб олишга уринган. Суданни бошқарувчи ҳарбий кенгашдаги манбаларга кўра, айни пайтда исённинг барча иштирокчилари ҳибсга олинган.
2019 йил апрелида Суданда давлат тўнтариши оқибатида 1993 йилдан буён президентлик қилиб келаётган Умар ал-Башир ҳокимиятдан четлатилган ва ҳибсга олинган эди. Ҳокимият Ҳарбий кенгаш қўлига ўтганди. Май ойида ҳарбийлар ва мухторият мамлакатда уч йил муддатга ўтиш даврини жорий қилишга келишиб олди. Бироқ мухолифат иш ташлашни бошлаб, ҳукуматни тезроқ шакллантиришга даъват этди. Мамлакатда тартибсизликлар давом этаверди.
2019 йил декабрида Умар ал-Башир коррупция ва чет эл валютасига ноқонуний эгалик қилгани учун икки йил муддатга ахлоқ тузатиш колониясига маҳкум қилинди. У ҳокимиятдан туширилгач, уйидан 130 миллион доллар пул солинган жомадонлар топилган.
Бугунги ҳарбий исён уюштиришга уриниш ал-Башир президентлигидан кейин Суданда юз берган биринчиси эмас. 2020 йил январида мамлакатда ҳокимиятни эгаллаб олишга разведка офицерлари уриниб кўрган эди.
Изоҳ (0)