Rossiyaning Perm davlat milliy tadqiqot universitetida sodir etilgan otishma chog‘ida kamida uch nafar Turkmaniston fuqarosi jabrlangan, deb yozadi Central Asia nashri. So‘nggi ma’lumotlarga ko‘ra, universitetga qilingan hujumda jami olti kishi halok bo‘lgan, 20 dan ortiq odam jarohat olgan.
Nashr xabariga ko‘ra, jarohat olgan turkmanistonliklar ro‘yxatiga 26 yoshli Oybibi Saparova, 24 yoshli Nuryog‘di Saparov va 23 yoshli Saparturdi Berdiyev kiradi. Ularning ijtimoiy tarmoqlardagi sahifalarini tahlil qilgan turkmen.news ushbu talabalar turkmanistonlik, degan xulosaga keldi. Oybibi Saparova, aftidan, toshhovuzlik.
Dastlabki ma’lumotlarga ko‘ra, Oybibining kichik boldir suyagi va o‘ng panjasi, Nuryog‘dining panja o‘zagi suyaklari singan. Sinishlarni ushbu talabalar otishma boshlanganidan keyin o‘zini derazadan tashlagani sabab orttirgan. Saparturdi Berdiyev qanday jarohat olgani hozircha noma’lum.
20-sentabr kuni tongda Perm davlat milliy tadqiqotlar universiteti talabasi Timur Bekmansurov oliygoh hududiga miltiq bilan kirdi va yo‘lida uchragan odamga o‘q uza boshladi. Hodisa tufayli talabalar derazalardan tashqariga sakragan. Ko‘pchilik o‘z sinfxonasida barrikadalar qurib o‘ralib olgan. Hujumchi kamida 30 marta o‘q uzgan, taxminlarga ko‘ra, o‘qlar Huglu 12 kalibrli silliq stvolli quroldan otilgan.
Universitetga hujum qilgan shaxs qo‘lga olindi, deya ma’lum qildi Tergov qo‘mitasi. Dastlab uning o‘ldirilgani haqida xabar berilgan, ammo bu ma’lumot tasdiqlanmagan. Hibsga olish paytida o‘q otuvchi qurolli qarshilik ko‘rsatgan va yaralangan.
O‘zbekiston Tashqi ishlar vazirligi rasmiy vakili Yusuf Kabuljonovning ma’lumotiga ko‘ra, Perm universitetida ro‘y bergan otishmada jarohatlangan va halok bo‘lganlar orasida O‘zbekiston fuqarolari qayd etilmagan.
Vaziyat O‘zbekistonning Qozon shahridagi Bosh konsulxonasi tomonidan nazoratga olingan.
Izoh (0)