“Al-Qoida” terrorchilari bir-ikki yil ichida Afg‘onistonda mustahkam o‘rnashib olishi va AQShga hujum uyushtirish salohiyatini tiklashi mumkin. Bu haqda AQSh Mudofaa vazirligi razvedka boshqarmasi rahbari Skott Berriyerga tayanib, “RBK” xabar berdi.
“‘Al-Qoida’ning AQShga tahdid qilish imkoniyatlarini tiklab olishiga berilayotgan hozirgi konservativ baho, ehtimol, bir yildan ikki yilgacha”, — dedi u.
Berriyerning qo‘shimcha qilishicha, Razvedka boshqarmasi “turli xildagi manbalar va imkoniyatlar bilan Afg‘onistonga qaytish” yo‘llarini qidirmoqda.
Markaziy razvedka boshqarmasi direktori Devid Koenning so‘zlariga ko‘ra, AQSh hukumati “Al-Qoida”ning Afg‘onistondagi faoliyatini qayta tiklash bo‘yicha ishlarni diqqat bilan kuzatmoqda. Ushbu guruhning kuchayishi haqida Koenning prognozlari ham bir yildan ikki yilgacha bo‘lgan davrni o‘z ichiga oladi.
Bundan avval AQSh razvedkasi “Al-Qoida” hozirgi vaziyatda Afg‘onistondan tashqarida hujumlar uyushtirishga qodir emasligini aytgandi. “Razvedka hamjamiyatining joriy bahosiga ko‘ra, ‘Al-Qoida’ning imkoniyatlari ancha oldin shu qadar tanazzulga uchraganidan hozir u chet elda hujumlar uyushtira olmaydi”, — dedi AQSh Davlat kotibi Entoni Blinken.
Aprel oxirida “Al-Qoida” AQShga qarshi “har tomondan hujum qilish” bilan keng ko‘lamli urush boshlashni va’da qilgandi. Terrorchilik tashkiloti vakillari ushbu urushning “AQSh butun islom dunyosidan chiqarib yuborilgunga qadar” davom etishini qayd etgan.
2001-yil 11-sentabrda “Al-Qoida” jangarilari AQShda qator teraktlar uyushtirgan. Xudkush terrorchilar to‘rtta samolyotni egallab olgan: ulardan ikkitasi Nyu-Yorkdagi Jahon savdo markazi minoralariga, yana biri Vashingtonda Pentagon binosiga urilgan, to‘rtinchi samolyot Pensilvaniyada qulab tushgan. 2977 kishi teraktlar qurboniga aylangan.
O‘shanda Afg‘onistonda hukmronlik qilayotgan “Tolibon” 11-sentabr voqealarini uyushtirgan “Al-Qoida” rahbari Usama bin Ladenni AQShga topshirishdan bosh tortgan. Bu esa AQShning Afg‘onistondagi 20 yillik urushini boshlab berdi. Ko‘plab ekspertlarning fikricha, Afg‘onistonda “Tolibon”ning qayta hokimiyatga ko‘tarilgani xalqaro terrorchi guruhlarning jonlanishiga sabab bo‘lishi mumkin.
Izoh (0)