АҚШ разведкаси «Ал-Қоида» 1-2 йил ичида ҳужумга ўтиши мумкинлигидан огоҳлантирди

«Ал-Қоида» террорчилари бир-икки йил ичида Афғонистонда мустаҳкам ўрнашиб олиши ва АҚШга ҳужум уюштириш салоҳиятини тиклаши мумкин. Бу ҳақда АҚШ Мудофаа вазирлиги разведка бошқармаси раҳбари Скотт Берриерга таяниб, «РБК» хабар берди.

«‘Ал-Қоида’нинг АҚШга таҳдид қилиш имкониятларини тиклаб олишига берилаётган ҳозирги консерватив баҳо, эҳтимол, бир йилдан икки йилгача», — деди у.

Берриернинг қўшимча қилишича, Разведка бошқармаси «турли хилдаги манбалар ва имкониятлар билан Афғонистонга қайтиш» йўлларини қидирмоқда.

Марказий разведка бошқармаси директори Дэвид Коэннинг сўзларига кўра, АҚШ ҳукумати «Ал-Қоида»нинг Афғонистондаги фаолиятини қайта тиклаш бўйича ишларни диққат билан кузатмоқда. Ушбу гуруҳнинг кучайиши ҳақида Коэннинг прогнозлари ҳам бир йилдан икки йилгача бўлган даврни ўз ичига олади.

Бундан аввал АҚШ разведкаси «Ал-Қоида» ҳозирги вазиятда Афғонистондан ташқарида ҳужумлар уюштиришга қодир эмаслигини айтганди. «Разведка ҳамжамиятининг жорий баҳосига кўра, ‘Ал-Қоида’нинг имкониятлари анча олдин шу қадар таназзулга учраганидан ҳозир у чет элда ҳужумлар уюштира олмайди», — деди АҚШ Давлат котиби Энтони Блинкен.

Апрель охирида «Ал-Қоида» АҚШга қарши «ҳар томондан ҳужум қилиш» билан кенг кўламли уруш бошлашни ваъда қилганди. Террорчилик ташкилоти вакиллари ушбу урушнинг «АҚШ бутун ислом дунёсидан чиқариб юборилгунга қадар» давом этишини қайд этган.

2001 йил 11 сентябрда «Ал-Қоида» жангарилари АҚШда қатор терактлар уюштирган. Худкуш террорчилар тўртта самолётни эгаллаб олган: улардан иккитаси Нью-Йоркдаги Жаҳон савдо маркази минораларига, яна бири Вашингтонда Пентагон биносига урилган, тўртинчи самолёт Пенсильванияда қулаб тушган. 2977 киши терактлар қурбонига айланган.

Ўшанда Афғонистонда ҳукмронлик қилаётган «Толибон» 11 сентябрь воқеаларини уюштирган «Ал-Қоида» раҳбари Усама бин Ладенни АҚШга топширишдан бош тортган. Бу эса АҚШнинг Афғонистондаги 20 йиллик урушини бошлаб берди. Кўплаб экспертларнинг фикрича, Афғонистонда «Толибон»нинг қайта ҳокимиятга кўтарилгани халқаро террорчи гуруҳларнинг жонланишига сабаб бўлиши мумкин.