Shimoliy Koreya Yapon dengizi tomonga ikkita ballistik raketa uchirdi. Bu haqda Janubiy Koreyaning Yonhap agentligi Shtab boshliqlari birlashgan qo‘mitasiga (JCS) tayanib xabar berdi.
Nashrning yozishicha, Shimoliy Koreyaning markaziy hududlaridan “noma’lum turdagi raketalar” uchirilgan. Janubiy Koreya va AQSh xizmatlari tafsilotlarni tahlil qilmoqda, deydi JCS bayonotida.
“Bizning kuchlarimiz AQSh bilan yaqindan hamkorlik qilgan holda to‘liq shay turibdi”, — deya qayd etdi harbiylar.
Shu bilan birga, Pxenyanning muvaffaqiyatli raketa uchirgani haqidagi ma’lumotlarni e’lon qiladigan Koreya markaziy telegraf agentligi bu safar hech qanday xabar bermagan. Yaponiyaning NHK telekanaliga ko‘ra, Tokio Shimoliy Koreya ballistik raketani uchirgan deb hisoblamoqda. Hukumat hozircha raketaning uchirilishi haqida ma’lumot yig‘moqda, deya qo‘shimcha qildi kanal.
Yaponiya Mudofaa vazirligining xabar berishicha, uchirilgan raketalar Yaponiya havo hududiga kirmagan va mamlakat iqtisodiy zonasidan tashqariga qulagan, deb xabar beradi Kyodo agentligi.
Shunga qaramay, Yaponiya bosh vaziri Yosixide Suga raketa uchirilgandan keyingi bayonotida KXDR faoliyatini Yaponiya va butun mintaqaga tahdid deb atadi.
Ikki kun oldin KXDR yangi uzoq masofaga mo‘ljallangan qanotli raketani muvaffaqiyatli tarzda sinovdan o‘tkazgani haqida e’lon qilgandi.
Raketa 1,5 ming kilometr masofada joylashgan nishonga tegdi, deyiladi xabarda. Yangi qanotli raketani ishlab chiqish so‘nggi ikki yildan buyon davom etayotgandi. Bu vaqt ichida qurolning alohida qismlari sinovlardan muvaffaqiyatli o‘tgan.
Shimoliy Koreyaning qanotli raketaning muvaffaqiyatli sinovi haqidagi da’volari Yaponiyaning xavotiriga sabab bo‘ldi.
“Bu (raketa uchirilishi) mamlakat xavfsizligiga tahdid soladi va Yaponiya uchun tashvish uyg‘otadi”, — dedi Yaponiya hukumati bosh kotibi Katsunobu Kato.
Uning so‘zlariga ko‘ra, Yaponiya hukumati KXDRning harbiy sohadagi barcha harakatlarini diqqat bilan kuzatib bormoqda, biroq uchirilgan raketa Yaponiyaning eksklyuziv iqtisodiy zonasiga o‘tgani hali tasdiqlanmagan. “Ayni paytda biz batafsil tahlil olib bormoqdamiz”, — deya qo‘shimcha qildi u.
Eslatib o‘tamiz, 25-mart kuni Shimoliy Koreya ikkita taktik raketaning muvaffaqiyatli sinovlari haqida ma’lum qilgandi. Koreyalik harbiylar xabariga ko‘ra, ikkala raketa ham KXDR sharqiy qirg‘oqlaridan 60 kilometr masofada joylashgan nishonga muvaffaqiyatli borib teggan.
Bundan tashqari, KXDR mart oyida Yapon dengiziga qarata ikkita ballistik raketa uchirgandi. Raketa sinovlari haqida Yaponiya Mudofaa vazirligi va Janubiy Koreya harbiylari ma’lum qilgan. Bungacha esa AQSh harbiylari Pxenyan tez orada ballistik raketalar uchirishni qayta boshlashi haqida ogohlantirgan edi.
Keyinroq Shimoliy Koreya tomonidan ballistik raketalarning uchirilishi AQSh va Yaponiyaning doimiy tahdidlari oldida o‘zini himoya qilish bo‘lgani haqida aytildi.
Izoh (0)