Xalqaro moliya instituti (IIF) hisob-kitoblariga ko‘ra, 2021-yilning ikkinchi choragida jahon qarzi rekord darajaga — 296 trillion dollarga yetgan. Bu koronavirus pandemiyasidan avvalgi ko‘rsatkichdan 36 trillionga ko‘p.
“2021-yilning ikkinchi choragida jahon qarzi 4,8 trillion dollarga oshdi va rekord darajadagi 296 trillion dollarga yetdi”, — deyiladi IIF saytida.
Global qarz hukumatlar, banklar, korporatsiyalar va uy xo‘jaliklari qarzini o‘z ichiga oladi. IIF’ning barqarorlikni tadqiq qilish bo‘limi direktori Emre Tiftikning so‘zlariga ko‘ra, iqtisodiy tiklanish darajasi pandemiyadan avvalgi holatga qaytish uchun hali yetarli emas. Uning ta’kidlashicha, agar qarz olish shunday maromda davom etsa, global qarz 300 trillion dollardan oshadi.
Shu bilan birga, ikkinchi chorakda jahon qarzining YaIMga nisbati 2021-yilning birinchi uch oyi ko‘rsatkichlariga nisbatan yaxshilandi, deyiladi hisobotda.
Yoz o‘rtalarida jahon qarzi YaIMning 353 foizini tashkil etgandi — bu birinchi chorakka qaraganda 9 foizga kam. IIF hisobotiga ko‘ra, bu ko‘rsatkich hozircha faqat Argentina, Daniya, Irlandiya, Livan va Meksikada pandemiyadan oldingi darajani saqlab turibdi.
Ma’lumot uchun, O‘zbekiston davlat qarzi 2021-yilning 1-iyul holatiga 858,6 million dollarga yoki 3,7 foizga oshib, 24,2 milliard dollarni tashkil qilmoqda. Qayd etilishicha, davlat qarzi yalpi ichki mahsulotga (YaIM) nisbatan 38,5 foizni tashkil etmoqda.
Bunda davlat tashqi qarzi qoldig‘i – 21,8 milliard dollarni yoki YaIMga nisbatan 34,7 foizni, davlat ichki qarzi qoldig‘i – 2,4 milliard dollarni yoki YaIMga nisbatan 3,8 foizni tashkil etmoqda.
Izoh (0)