Eron Atom energiyasi xalqaro agentligi (MAGATE) inspektorlariga mamlakat yadro obyektlaridagi kuzatuv kameralari xizmatlarini ko‘rsatish va ularni kuzatishga ruxsat beradi. Ushbu qaror Tehronda MAGATE bosh direktori Rafael Grossi hamda Eron atom energiyasi tashkiloti rahbari Muhammad Islomiy o‘rtasidagi uchrashuvda qabul qilingan, deya xabar berdi “Kommersant”.
“Uchrashuvda tomonlar o‘zaro ishonch ruhidagi hamkorlik nihoyatda zarur ekanini eslatib o‘tishdi va konstruktiv muloqot muhitida muhim qarorlar chiqarish kerakligini ta’kidladi”,— deyiladi MAGATE xabarida. Shuningdek, tomonlar hamkorlikni davom ettirgan holda tez-tez uchrashuvlar o‘tkazib turishni kelishib olgan.
“Ushbu maqsadlarni amalga oshirish uchun vitse prezident hamda Eron atom energiyasi tashkiloti rahbari MAGATE bosh direktori bilan tez orada bo‘lib o‘tadigan xalqaro konferensiya vaqtida uchrashadi, shuningdek, MAGATE bosh direktori yaqin kelajakda Tehronga keladi va bu yerda mamlakat hukumati miqyosida yuqori darajadagi maslahatlashuvlar o‘tkaziladi”,— deyiladi MAGATE axborotida.
Avgustda Reuters agentligi MAGATEdagi manbaga asoslanib, Eronning may oyida Natanzdagi yadro obyektida sentrifugani takomillashtirish va uranni 60 foizga boyitish uchun bir-biriga ketma-ket ulangan bitta tizmadan foydalangan bo‘lsa, endi tizmalar soni ikkitaga yetganini xabar qilgan. Eron Natanzdagi IR-6 164 ta sentrifugaga ega. Endi IR-4 ikkinchi tizmasida 153 ta sentrifuga qurilmasi mavjud. Eron avval ham yadro dasturini rivojlantirishda davom ettirish niyati borligini yashirmagan.
Iyun oyida Eronning MAGATEga o‘z yadro obyektlari bo‘yicha ma’lumotlarni uzatishni to‘xtatishi xabar qilingandi.
Izoh (0)