AQSh federal qidiruv byurosi 2001-yil 11-sentabr teraktlariga oid birinchi hujjatni e’lon qildi. Avvalroq mamlakat prezidenti Jo Bayden sentabr voqealariga aloqador maxfiy hujjatlarni e’lon qilishni buyurgandi.
16 varaqli hujjat 2016-yil 4-aprelda ro‘yxatga olingan va uning matni kupyuralar bilan yozilgan. Associated Press’ning yozishicha, hujjatda AQShdagi Saudiya Arabistoni fuqarolari bilan tez-tez gaplashib turgan kimsaning ko‘rsatmalari kiritilgan. So‘roq 2015-yilda o‘tkazilgan.
Hujjatda terrorchilarning AQShdagi saudiyalik sheriklari bilan aloqalari haqida batafsil axborot berilgan, ammo Saudiya Arabistonining yuqori lavozimdagi vakillarining ushbu fitnaga aloqadorligi yuzasidan dalil-isbotlar keltirilmagan.
Avvalroq AQShdagi Saudiya Arabistoni elchixonasi 11-sentabrdagi teraktlar bo‘yicha maxfiy hujjatlarning e’lon qilinishini olqishlagan va bu “qirollikni asossiz ayblashlarga uzil-kesil chek qo‘yishini” qayd etgandi. Elchixonada teraktlarga Saudiya Arabistoni hukumatining aloqadorligi haqidagi barcha taxminlarni yolg‘on deb atagan.
2001-yil 11-sentabrda teraktlar sodir etgan 19 nafar terrorchining 15 nafari Saudiya Arabistoni fuqarolari bo‘lgan. Qirollik teraktlar uchun mas’uliyatni zimmasiga olishdan bosh tortgan.
Izoh (0)