11-sentabr kuni Xitoyda mamlakat ichidagi yana bir hudud – Futszyan provinsiyasi COVID-19 o‘choqlaridan biriga aylandi. Bu haqda Xitoy sog‘liqni saqlash davlat qo‘mitasi axborotiga tayanib, “Interfaks” xabar bergan.
Xabarga ko‘ra, 11-sentabr kuni Futszyan provinsiyasining Putyan hamda Syuanchjou shaharlarida jami 19 ta koronavirus yuqtirib olish bilan bog‘liq lokal tarqalish holati kuzatilgan.
Ortda qolgan bir sutka ichida mamlakatda jami 46 ta kasallanish holati qayd etilgan, kasallanganlarning 26 nafari xorijdan kelgan fuqarolar bo‘lgan.
Avgust boshlarida Szyansu provinsiyasining Nankin shahrida koronavirus bilan kasallanish holatlarining soni ortib ketgandi, bu yerda mahalliy aeroportda xorijdan kelgan avialaynerlar tozalovchi ishchilar orasida COVID-19 bilan kasallanish holatlari kuzatilgandi. Oqibatda COVID-19 tufayli Xitoy o‘z fuqarolariga xorijga chiqish pasporti berishni vaqtincha to‘xtatgan. Keyinchalik avgust oxirida Xitoyda koronavirus tarqalishi keskin kamaygani xabar qilindi.Pandemiya boshlanganidan beri Xitoyda jami 95 199 ta kasallanish holati kuzatilgan, shu vaqtga qadar 4636 nafar bemor COVID-19 asoratlari oqibatida vafot etgan.
Izoh (0)