20 yil avval 11-sentabr kuni AQShda terrorchilar guruhi to‘rtta yo‘lovchi samolyotini egallab olgandi. Xudkush jangarilar ikkita laynerni Nyu-Yorkdagi Jahon savdo markazining egizak binolariga, yana bir samolyotni Vashingtondagi Pentagon binosiga yo‘naltirgan, to‘rtinchi samolyot Pensilvaniyadagi Shanksvill shahrida yerga qulagan. Teraktlar oqibatida 2,9 mingdan ziyod odam jabr ko‘rgan. “Al-Qoida” terrorchilik tashkiloti mazkur qo‘poruvchilik harakatlari uchun mas’uliyatni o‘z zimmasiga olgandi. “RBK” AQShda mazkur terrorchilik harakatlari oqibatida halok bo‘lgan minglab odamlar qanday xotirlangani haqida fotoreportajni taqdim etdi.
11-sentabr kuni AQShdagi dahshatli teraktlar sodir etilganiga 20 yil to‘ldi. AQSh prezidenti Jo Bayden mamlakatdagi davlat bayroqlarini tushirish va 10–12-sentabr kunlarini ibodat va xotira kunlari sifatida o‘tkazish haqida farmoyish chiqardi.
Bayden sana munosabati bilan Amerika xalqiga videomurojaat yo‘lladi, unda fuqarolarni fojianing 20 yilligi munosabati bilan birdam bo‘lishga chaqirdi. “Birdamlik — bizdagi buyuk kuch. Bu bizni o‘zligimizga qaytaradi. Kim ekanligimizni hech qachon unutmasligimiz kerak”, — degan prezident.
Nyu-Yorkda teraktlardan avval egizak binolar bo‘lgan joyda qurilgan xotira majmuasi, Pentagon binosi o‘rnidagi joy, shuningdek, Shanksvilda samolyot qulagan yerda xotira tadbirlari o‘tkazildi.
Marosimlarda egizak binolarga samolyotlar urilgani, Pentagonga hujum uyushtirilgani, Pensilvaniyaga samolyot qulagani munosabati bilan qurbonlar xotirasiga hurmat tarzida olti bor sukut saqlash so‘raldi.
Bayden rafiqasi Jill bilan birgalikda Nyu-Yorkdagi motam marosimlariga keldi, AQSh sobiq prezidentlari Barak Obama hamda Bill Klinton ham rafiqalari bilan birga tadbirlarda ishtirok etdi.
Marosimlarda rok-musiqachi Bryus Springstin ham qatnashdi. Qo‘shiqchi I’ll See You in My Dreams (“Seni tushlarimda ko‘raman”) kompozitsiyasini ijro etdi.
Teraktlarda halok bo‘lganlarning qarindoshlari qo‘ng‘iroqlar birma-bir chalingan vaqtda qurbonlarning ismlarini aytib ularni xotirladi.
20 yillik arafasida Nyu-Yorkda yana ikki nafar qurbon 2001-yilda sodir bo‘lgan teraktlarda halok bo‘lganlar ro‘yxatiga qo‘shildi. Shu tariqa halok bo‘lganlarning umumiy soni 1647 nafarni tashkil qilmoqda, portlashdan keyin o‘lganlarning 40 foizi ya’ni 1106 nafar odamning shaxsini aniqlashning imkoni bo‘lmagan.
Mavzuga doir: “11-sentabr bolalari”: kimdir otasining so‘nggi soatlaridan hamon ta’qibda, boshqasi har yilgi motam marosimidan zada
Mavzuga doir: AQSh maxfiy xizmati 11-sentabr voqealarini aks ettiruvchi ilgari chop etilmagan fotosuratlarni e’lon qildi
Portlab ketgan egizak binolar yaqinida sana munosabati bilan ushbu binolar ramzi sifatida nur ustunlari bunyod qilindi.
Izoh (0)