Jons Hopkins universiteti ma’lumotlariga ko‘ra, dunyoda 198 291 544 kishi COVID-19 bilan kasallangan, shularning 4 224 015 nafari vafot etgan. Kasallanish holatlarining ko‘pligi bo‘yicha AQSh (35 million), Hindiston (31,6 million), Braziliya (19,9 million), Fransiya (6,2 million) va Rossiya (6,2 million) eng oldinda bormoqda.

Foto: EPA

Xitoy hukumati hozircha COVID-19 tarqalishini to‘xtatishga muvaffaq bo‘lmayotganini ma’lum qildi.

Hukumat ko‘rgan choralarga qaramasdan, Xitoy ichida COVID-19 bilan kasallanish holatlari o‘tgan bir kecha-kunduzda 55 taga ko‘paydi. Undan oldingi kuni (31-iyul) 53 ta shunday holat qayd etilgan edi.

Yakshanba kuni (1-avgust) Xitoyda kasallanganlar soni jami 98 kishiga oshdi, ularning 43 nafari chet eldan kirib kelgan. Mamlakat ichida virusni yuqtirish holatlari Szyansu, Xunan, Xubey, Shandun, Xenan, Xaynan, Yunnan provinsiyalarida va Pekinda qayd etildi. Kasallanish holatlarining o‘sishini ekspertlar delta shtamm bilan bog‘lamoqda.

Mamlakat ichida infeksiya tarqalishi bo‘yicha birinchi o‘rinda Juyli (Yunnan provinsiyasi), ikkinchi o‘rinda esa Nankin (Szyansu provinsiyasi) shaharlari bormoqda. Juylida virus iyul oyida qo‘shni Myanmadan o‘tgan bo‘lsa, Nankinda esa chet eldan yetib kelgan avialaynerlarni tozalash bilan shug‘ullangan aeroport xodimlari virus tarqatuvchiga aylandi.

Aholisi 9,3 milliondan ortiq bo‘lgan Nankin hukumati yuz minglab odamlarni yakkalanish rejimiga joylashtirdi. Shuningdek, u yerda millionlab odamlar koronavirus testidan o‘tkaziladi. Endi Nankinni hamda Chjanszyasze (Xunan provinsiyasi)ni tark etgan shaxslarni tekshirib borishga urinishmoqda. Ayni paytda hukumat Chjanszyaszeda yashaydigan 1,5 million aholining barchasi uchun yakkalanish rejimini joriy qilib, mahalliy sayyohlik nuqtalarini yopib qo‘ydi.

Estoniya olimlari koronavirusga qarshi sprey ishlab chiqdi, u eng ko‘p xavotir uyg‘otuvchi shtammlarning barchasidan himoya qiladi.

Gen injeneriyasi bilan shug‘ullanuvchi Icosagent kompaniyasi ilmiy direktori Mart Ustav ma’lum qilishicha, laboratoriya tadqiqotlari burunga sepiladigan dori, JSST fikricha, eng ko‘p xavotir uyg‘otadigan shtammlarning barchasidan, shu jumladan, hozirda Estoniyada tarqalayotgan delta shtammdan ham himoya qiladi.

“Biz jamoamiz bilan virusdagi o‘zgarishlarni doimiy ravishda kuzatib borib, BioBlock spreyining hali keng tarqalib ulgurmagan shtammlarni neytrallashtirish qobiliyatini sinamoqdamiz”, — dedi Ustav.

Jahon sog‘liqni saqlash tashkiloti (JSST)ning Favqulodda holatlar qo‘mitasi dunyo hamjamiyatini 2022-yil o‘rtalarigacha aholining 60 foizini emlashga chaqirdi.

JSST vakillari eslatishicha, COVAX vaksinalarni taqsimlash mexanizmi orqali atigi 90 million doza dori o‘tgan, butun dunyo bo‘ylab esa 3 milliard doza vaksina tarqalgan.

JSST tashkilotga a’zo mamlakatlarga 2021-yil sentabrgacha dunyo aholisining kamida 10 foizini, dekabrgacha  — 40 foizini, 2022-yil o‘rtalarigacha esa 60 foizini emlashga da’vat etdi. “Aholining zaif guruhlarini COVID-19 variantlari paydo bo‘lishi va tarqalishidan himoya qilish uchun global birdamlikni kuchaytirish talab etiladi”, — deyiladi JSST xabarida.

Ushbu maqsadga erishish uchun to‘rt oy ichida daromad darajasi past va o‘rtacha bo‘lgan mamlakatlarda yana 250 million kishi vaksinatsiyadan o‘tishi kerak.

“Bu pandemiya yuqori darajada yuqumli virus keltirib chiqardi, ammo taqsimot, tengsizlik hamda kelajakka sarmoya kiritishga tayyor bo‘lmaslik uni bir necha marotaba kuchaytirdi. Shuning uchun biz jamiyatimizning kamchiliklarini bartaraf qilishimiz kerak”, — deyiladi xabarda.

Berlinda koronavirus cheklovlariga qarshi namoyishlarda 600 ga yaqin odam qo‘lga olindi.

1-avgust kuni shaharda shu mavzuga bag‘ishlangan 13 ta norozilik aksiyasi bo‘lib o‘tdi. Brandenburg darvozasi yaqinidagi maydonga suv zambaraklari olib kelindi. U yerda Querdenken 711 harakatining yuzlab tarafdorlari to‘plandi. Namoyishga pandemiya chog‘ida ijtimoiy masofa qoidalariga rioya qilish ilojsizligi tufayli shahar hukumati tomonidan rozilik berilmagan.

Dastlab politsiyachilar aksiya o‘tkazilishining oldini olishni rejalashtirgan edi, ammo bunga muvaffaq bo‘lmadi.