Gaiti poytaxti Port-o-Prens prokurori Bed-For Klod 10-sentabr kuni mamlakat bosh vaziri Ariel Anriga sudga chaqiruv qog‘ozini yubordi. Bosh vazir prezident Jovenel Moizning o‘ldirilishi yuzasidan guvohlik berish uchun prokuraturaga chaqirilgan, deb yozadi “TASS”.
Hujjatga ko‘ra, respublika hukumati rahbari 14-sentabr kuni sudga kelishi kerak.“Chaqiruv qog‘ozida aytilishicha, bosh vazir va asosiy gumondorlardan biri Jozef-Feliks Badyu prezident o‘ldirilgan kuni telefon orqali gaplashgani tasdiqlangan”, — deya xabar berdi Gazette Haiti mahalliy axborot portali. Nashrning qayd etishicha, tegishli ma’lumotlar mamlakatdagi siyosiy inqirozni hal qilish bo‘yicha hukumat va muxolifatchilar o‘rtasida shartnoma imzolanishidan bir kun oldin paydo bo‘lgan.
Gaiti prezidenti Jovenel Moiz 7-iyulga o‘tar kechasi qurolli hujumchilar tomonidan o‘z qarorgohida otib o‘ldirilgan. Hodisada prezidentning rafiqasi ham og‘ir jarohat olgan, ammo u AQShga olib ketilib, tibbiy yordam bilan hayoti saqlab qolingan. Mamlakat bosh vaziri vazifasini vaqtinchalik bajaruvchi Klod Jozefning aytishicha, hujum qilganlar ingliz va ispan tillarida so‘zlashgan. Gaiti ovoz berish va partiyalararo aloqa ishlari vaziri Matias Pyerning ta’kidlashicha, Moizning o‘ldirilishi 26 kishidan iborat to‘da tomonidan uyushtirilgan. Ulardan to‘rt nafari otib tashlangan.
Keyinroq Jovenel Moizga qarshi operatsiyani tayyorlashda markaziy shaxs bo‘lishi mumkin bo‘lgan odam — kelib chiqishi gaitilik bo‘lgan shifokor Kristian Emmanuel Sanon hibsga olindi.
Izoh (0)