Bayden 11-sentabr voqealarining 20 yilligi munosabati bilan Amerika xalqiga murojaat qildi

AQSh prezidenti Jo Bayden 11-sentabr voqealarining 20 yilligi munosabati bilan qurbonlar xotirasiga hurmat bajo keltirdi va Amerika xalqiga murojaat qildi. Davlat rahbarining nutqi uning Twitter’dagi sahifasida translyatsiya qilingan deb yozadi “Korrespondent.net”.

“Men uchun 11-sentabr — katta saboq. Uning mohiyati shundan iboratki, eng ojiz damlarda, Amerika ruhi uchun kurashda birlik bizning eng ulkan kuchimiz bo‘ldi. Birlik hammamiz yagona narsaga ishonishimiz kerakligini anglatmaydi. Biz bir-birimizga va ushbu millatga nisbatan hurmat va ishonchda bo‘lishimiz lozim”, — dedi Oq uy rahbari.

Uning ta’kidlashicha, “inson tabiatining qora kuchlari — qo‘rquv va g‘azab, nafrat va zo‘ravonlik Amerika birligiga putur yetkaza olmadi”.

Xabarlarga ko‘ra, bugun 11-sentabr kuni AQSh prezidenti va birinchi xonimi teraktlardan zarar ko‘rgan uchta joyga tashrif buyurishni rejalashtirmoqda: Nyu-Yorkdagi Jahon savdo markaziga, Pentagonga va United Airlines 93 reysi halokatga uchragan Pensilvaniya shtatining Shanksvill shaharchasi yaqinidagi maydonga.

Nyu-Yorkda xotira marosimi an’anaviy tarzda ertalabki soat 08:46 da boshlanadi, 2001-yil aynan shu daqiqada terrorchilar tomonidan o‘g‘irlangan birinchi samolyot savdo markazining shimoliy minorasiga qulab tushgan edi. Marosim chog‘ida barcha qurbonlarning ismlari teraktlar sodir etilgan daqiqalarda tanaffus bilan o‘qib eshittiriladi.

Avvalroq AQSh maxfiy xizmati 11-sentabr voqealarini aks ettiruvchi ilgari chop etilmagan fotosuratlarni e’lon qilgandi. Shuningdek, sentabr oyi boshida AQSh prezidenti Jo Bayden 11-sentabr teraktlari bilan bog‘liq hukumat hujjatlarini maxfiylikdan chiqarish va e’lon qilish haqidagi farmonni imzoladi. O‘z bayonotida Bayden shu tarzda saylovoldi va’dasini bajarayotganini tushuntirdi. “Men prezidentlikka nomzod bo‘lganimda Amerikaga 2001-yil 11-sentabrda uyushtirilgan teraktlar to‘g‘risidagi hujjatlarni ochiqlashni ta’minlash majburiyatini olganman. O‘sha fojiali kunning 20 yilligiga yaqinlashar ekanmiz, men bu majburiyatni bajaraman”, — dedi Bayden