Toshkentning Shayxontohur tumanida mast holda deb gumon qilgani uchun Matiz mashinasini boshqarishga yo‘l qo‘ymagan YPX xodimini haqoratlagani ishi bo‘yicha tegishli hujjatlar to‘planib, o‘rganib chiqish uchun jinoyat ishlari bo‘yicha Shayxontohur tumani sudiga yuborilgani haqida xabar berilgan edi. “Toshkent” telekanalining “Tezkor xabarlar” dasturida unga qanday jazo berilgani ma’lum qilindi.
Qayd etilishicha, mazkur holat yuzasidan ayol istiqomat qiluvchi Olmazor tumani “Ibrohim ota” mahallasida sayyor sud o‘tkazildi. Sud jarayonida YPX xodimi bodikamerasiga tushgan tasvirlar sud raisi va mahalla faollariga qo‘yib berildi.
Muhokama jarayonida ishtirokchilar agar IIB xodimlari ayolni to‘xtatib qolmaganida, u ichkilik ta’sirida o‘zining yoki boshqa haydovchilarning hayotini xavf ostiga qo‘yishi mumkinligini ta’kidlab o‘tdi. 38 yoshli ayolning o‘zi esa 4 nafar farzandini yolg‘iz o‘zi katta qilayotganini, ilgari ham sudlanganini bildirdi.
Sudning yakuniy qaroriga ko‘ra, qoidabuzar ayolga nisbatan Ma’muriy javobgarlik to‘g‘risidagi kodeksning 194-moddasi (ichki ishlar organlari xodimining qonuniy talablarini bajarmaslik) 1-qismi va 183-moddasi (mayda bezorilik) bilan javobgarlik belgilanib, 5 sutkaga ma’muriy qamoq jazosi belgilandi.
Ayol qilgan ishidan pushaymonligini bildirdi.
Izoh (0)