Toshkent viloyatida emlangandan so‘ng vafot etgan fuqaro o‘limiga vaksina sabab emasligi aniqlandi

Toshkent viloyatida koronavirusga qarshi emlanganidan so‘ng vafot etgani aytilgan fuqaro bo‘yicha holat nazoratga olinib, tezkor guruh tuzilgani haqida xabar berilgandi. Sog‘liqni saqlash vazirligi tezkor guruh o‘rganishlari natijasini e’lon qildi.

Tezkor guruh tarkibiga

• Respublika sud-tibbiy ekspertiza ilmiy-amaliy markazi direktori, vazirlik bosh sud-tibbiy eksperti, professor A.Iskandarov;
• Sanitariya-epidemiologiya va jamoat salomatligi xizmati immunoprofilaktika bo‘limi boshlig‘i D.Tursunova;
• bosh infeksionist B.Tadjiyev;
• bosh toksikolog A.Stopniskiy;
• bosh terapevt U.Kamilova;
• bosh allergolog I.Razikova kabi mutaxassislar kiritilgan edi.

“1983-yil 18-iyunda tug‘ilgan marhum S.Q. 2021-yilning 10-avgustida soat 11:00 larda ‘Tuyabo‘g‘iz’ oilaviy shifokorlik punktida, oilaviy shifokor ko‘rigidan o‘tkazilib, emlashga monelik qiluvchi holatlar aniqlanmagach, vaksinator hamshira tomonidan emlangan.

Vaksina olgandan keyin 20 daqiqa davomida oilaviy shifokor kuzatuvida bo‘lgan va aks ta’sirlar kuzatilmagach, uyiga ruxsat berilgan. Ekspertizada marhum S.Q.ning tanasida jarohat izlari aniqlanmadi”, — deydi Respublika sud-tibbiy ekspertiza ilmiy-amaliy markazi direktori, vazirlik bosh sud-tibbiy eksperti A.Iskandarov.

Sud-tibbiy ekspertizasi xulosasiga ko‘ra, marhum S.Q.ning 2021-yil 13-avgust, ya’ni u emlanganidan 3 kun o‘tib yuz bergan o‘limi emlashdan so‘ng uning sog‘lig‘ida sodir bo‘lgan o‘zgarish va shifokorlar tomonidan tavsiya etilgan preparatlar bilan bog‘liq emasligi aniqlandi.

Qayd etilishicha, emlashga eng asosiy moneliklardan biri hisoblangan anafilaktik shok holati va boshqa salbiy ta’sirlar vaksina qilingandan keyin 30 daqiqa ichidagina ro‘y berishi mumkin.

Shu bilan birga, kimyoviy moddalar bilan zaharlanish klinik belgilari ham kuzatilmagan.

Sud-tibbiy ekspertizaning yakuniy xulosasiga ko‘ra, marhum hayotligida o‘tkir zotiljam, bosh miya va miyachaning menigoensefaliti, epimiokardit kasalliklari bilan og‘rigan bo‘lib, bu xastaliklar uning o‘limi bilan to‘g‘ridan to‘g‘ri bog‘liqlikka ega ekani aniqlandi.

Ta’kidlanishicha, bugunga qadar Toshkent viloyatida 1 199 127 doza vaksina emlash jarayonlarida qo‘llanilgan. Emlangan bemorlar orasida vaksina ta’sirida birorta ham jiddiy salbiy ta’sirlar kuzatilmagan.