Тошкентнинг Шайхонтоҳур туманида маст ҳолда деб гумон қилгани учун Matiz машинасини бошқаришга йўл қўймаган ЙПХ ходимини ҳақоратлагани иши бўйича тегишли ҳужжатлар тўпланиб, ўрганиб чиқиш учун жиноят ишлари бўйича Шайхонтоҳур тумани судига юборилгани ҳақида хабар берилган эди. «Тошкент» телеканалининг «Тезкор хабарлар» дастурида унга қандай жазо берилгани маълум қилинди.
Қайд этилишича, мазкур ҳолат юзасидан аёл истиқомат қилувчи Олмазор тумани «Иброҳим ота» маҳалласида сайёр суд ўтказилди. Суд жараёнида ЙПХ ходими бодикамерасига тушган тасвирлар суд раиси ва маҳалла фаолларига қўйиб берилди.
Муҳокама жараёнида иштирокчилар агар ИИБ ходимлари аёлни тўхтатиб қолмаганида, у ичкилик таъсирида ўзининг ёки бошқа ҳайдовчиларнинг ҳаётини хавф остига қўйиши мумкинлигини таъкидлаб ўтди. 38 ёшли аёлнинг ўзи эса 4 нафар фарзандини ёлғиз ўзи катта қилаётганини, илгари ҳам судланганини билдирди.
Суднинг якуний қарорига кўра, қоидабузар аёлга нисбатан Маъмурий жавобгарлик тўғрисидаги кодекснинг 194-моддаси (ички ишлар органлари ходимининг қонуний талабларини бажармаслик) 1-қисми ва 183-моддаси (майда безорилик) билан жавобгарлик белгиланиб, 5 суткага маъмурий қамоқ жазоси белгиланди.
Аёл қилган ишидан пушаймонлигини билдирди.
Изоҳ (0)