Ijtimoiy tarmoq va internet saytlari orqali talabalar turar joylarida joylar cheklangani, oliy ta’lim muassasalari talabalarga sababsiz yotoqxonalardan joy bermayotgani haqida xabarlar tarqaldi.
Ushbu holatlarni o‘rganish maqsadida oliy va o‘rta maxsus ta’lim vaziri Abduqodir Toshqulov boshchiligida vazirlik mas’ul rahbarlaridan iborat tezkor guruh bir qator OTM yotoqxonalarida talabalarning turmush tarzi uchun yaratilgan sharoitlarni ko‘zdan kechirdi.
Jumladan, vazir Abduqodir Toshqulov Toshkent davlat iqtisodiyot universitetida bo‘lib, universitetning umumiy sig‘imi 867 o‘ringa mo‘ljallangan ikkita talabalar turar joyi bilan yaqindan tanishdi va yoshlarga yaratilgan sharoitlarni hamda hududlardan kelayotgan talabalarni yotoqxonalarga joylashtirish holatini o‘rgandi.
Ma’lum qilinishicha, hozirgi kunda universitetning talabalar turar joyida jami 867 nafar talaba yashashi uchun to‘liq sharoitlar yaratilgan bo‘lib, bugungi kungacha yotoqxonalarda hududlardan kelgan 686 nafar talaba, jumladan, 121 nafari imtiyoz asosida: shundan, 44 nafari – nogiron, 38 nafari – “temir daftar”, 29 nafari – chin yetim joylashtirilgan.
Talabalar turar joylarining qamrovini oshirish yuzasidan, xususan, 2 qavatli karavotlar sonini ko‘paytirish evaziga yana ko‘plab o‘rinlar ajratish mumkinligi ta’kidlanib, shular bo‘yicha aniq ko‘rsatmalar berildi.
Izoh (0)