Mamlakatimizda yoshlarga e’tibor masalasi davlat siyosati darajasiga ko‘tarilgan bo‘lib, ertamiz egalari o‘zining qiziqishlari bo‘yicha har tomonlama qo‘llab-quvvatlanmoqda. Bu borada “O‘zbekneftgaz” AJ boshqaruvi raisi Mehriddin Abdullayev tomonidan ham neft va gaz sohasida faoliyat olib borayotgan yoshlarga katta e’tibor qaratilmoqda.
Joriy o‘quv yilida aksiyadorlik jamiyatida faoliyat olib borayotgan bir guruh yoshlar Londonning Qirolicha Mariya va Brunel universitetlari hamda XALT Xalqaro biznes maktabiga, Germaniyaning Saarland universiteti, AQShning Florida shtati universitetlarining magistraturasiga qabul qilindi.
Boshqaruv raisi Mehriddin Abdullayev xorijiy davlatlarning nufuzli oliy o‘quv yurtlarida tahsil olish imkoniga ega bo‘lgan bir guruh yosh xodimlar bilan uchrashdi va ularning kelajakda yetuk mutaxassis kadrlar bo‘lib, neft va gaz sohasiga o‘zining munosib hissasini qo‘shishiga ishonch bildirdi.
Boshqaruv raisi topshirig‘i bilan aksiyadorlik jamiyati tomonidan ushbu yoshlarning kontrakt pullari to‘lab beriladi va turar joy uchun mablag‘ ajratiladi. Shuningdek, har yili yosh kadrlar magistrlik darajasini olish uchun xorijiy davlatlarga o‘qishga yuboriladi.
Uchrashuv chog‘ida Mehriddin Abdullayev yoshlarga chet elda yurtimiz va “O‘zbekneftgaz” AJ mavqeini yanada ko‘tarish, jamiyat brendini dunyoga tanitish kabi mas’uliyatlari ham borligini eslatib qo‘ydi. Shuningdek, yoshlarga maqsadlariga erishish uchun o‘z ustida tinimsiz ishlashini maslahat berdi.
Yoshlar esa yaratib berilgan imkoniyatlar uchun boshqaruv raisiga minnatdorchilik bildirishdi. Ular berilgan imkoniyatdan to‘g‘ri foydalanib, jamiyat rivoji uchun o‘z hissasini qo‘shish va eng asosiysi, bildirilgan ishonchni oqlashga va’da berishdi.
Uchrashuv yakunida Mehriddin Abdullayev tomonidan yoshlarga estalik sovg‘alari topshirildi.
“O‘zbekneftgaz” AJ matbuot xizmati
Izoh (0)