Xalq demokratik partiyasi fraksiyasining navbatdagi yig‘ilishida Qonunchilik muammolari va parlament tadqiqotlari instituti tomonidan bukmekerlik faoliyatini qonun jihatdan tartibga solish to‘g‘risidagi masala ko‘rib chiqildi, deb xabar beradi Parlament quyi palatasi matbuot xizmati.
Ta’kidlanishicha, bugungi kunda O‘zbekistonda ham onlayn qimor, ayniqsa, yoshlar orasida sportga pul tikish (betting) ommalashib bormoqda. Buning oqibatida oilaviy nizolar, turli xil ko‘ngilsiz hodisalar yuzaga kelmoqda.
Tahlillar davomida bukmekerlik faoliyatini amalga oshirish mexanizmlari, xususan, faoliyat yuritish talablari, ruxsat berish tartib-taomillari, bukmekerlik faoliyatini amalga oshirishdagi cheklovlar ijtimoiy munosabatlarning qonun bilan tartibga solinmagani aniqlangan.
Bir qator xorijiy davlatlarda bukmekerlik faoliyatini amalga oshirish qonun bilan tartibga solinadi. Jumladan, Buyuk Britaniya qonunchiligida (Gambling Act, 2005) voyaga yetmagan shaxslarni qimor va garov o‘yinlaridan himoya qilish masalalari, xususan, voyaga yetmagan shaxslarni qimor va garov o‘yinlariga jalb qilganlik uchun javobgarlik belgilangan.
Yuqoridagilardan kelib chiqib, “O‘zbekiston Respublikasining ayrim qonun hujjatlariga o‘zgartish va qo‘shimchalar kiritish to‘g‘risida”gi qonun loyihasini tayyorlash hamda unga ko‘ra, O‘zbekistonning qator qonunlariga bukmekerlik faoliyatini amalga oshirish mexanizmlari, xususan, faoliyat yuritish talablari, ruxsat berish tartib-taomillari, bukmekerlik faoliyatini amalga oshirishdagi cheklovlar nazarda tutuvchi normalarni kiritish taklif etilmoqda.
Deputatlarning fikricha, ushbu tashabbusni amalga oshirish orqali bukmekerlik sohasidagi ijtimoiy munosabatlarni huquqiy jihatdan tartibga solishga erishiladi.
Yig‘ilishda ko‘rib chiqilgan barcha masalalar yuzasidan tegishli qaror qabul qilingan.
Avvalroq Monopoliyaga qarshi kurashish qo‘mitasi huzuridagi Iste’molchilar huquqlarini himoya qilish agentligi O‘zbekiston hududida bukmekerlik va totalizator faoliyatini amalga oshirish uchun biror-bir xo‘jalik yurituvchi subyektlarga litsenziya berilmaganini ma’lum qilgandi.
Izoh (0)