Мамлакатимизда ёшларга эътибор масаласи давлат сиёсати даражасига кўтарилган бўлиб, эртамиз эгалари ўзининг қизиқишлари бўйича ҳар томонлама қўллаб-қувватланмоқда. Бу борада «Ўзбекнефтгаз» АЖ бошқаруви раиси Меҳриддин Абдуллаев томонидан ҳам нефть ва газ соҳасида фаолият олиб бораётган ёшларга катта эътибор қаратилмоқда.
Жорий ўқув йилида акциядорлик жамиятида фаолият олиб бораётган бир гуруҳ ёшлар Лондоннинг Қиролича Мария ва Брунел университетлари ҳамда ХАLT Халқаро бизнес мактабига, Германиянинг Saarland университети, АҚШнинг Флорида штати университетларининг магистратурасига қабул қилинди.
Бошқарув раиси Меҳриддин Абдуллаев хорижий давлатларнинг нуфузли олий ўқув юртларида таҳсил олиш имконига эга бўлган бир гуруҳ ёш ходимлар билан учрашди ва уларнинг келажакда етук мутахассис кадрлар бўлиб, нефть ва газ соҳасига ўзининг муносиб ҳиссасини қўшишига ишонч билдирди.
Бошқарув раиси топшириғи билан акциядорлик жамияти томонидан ушбу ёшларнинг контракт пуллари тўлаб берилади ва турар жой учун маблағ ажратилади. Шунингдек, ҳар йили ёш кадрлар магистрлик даражасини олиш учун хорижий давлатларга ўқишга юборилади.
Учрашув чоғида Меҳриддин Абдуллаев ёшларга чет элда юртимиз ва «Ўзбекнефтгаз» АЖ мавқеини янада кўтариш, жамият брендини дунёга танитиш каби масъулиятлари ҳам борлигини эслатиб қўйди. Шунингдек, ёшларга мақсадларига эришиш учун ўз устида тинимсиз ишлашини маслаҳат берди.
Ёшлар эса яратиб берилган имкониятлар учун бошқарув раисига миннатдорчилик билдиришди. Улар берилган имкониятдан тўғри фойдаланиб, жамият ривожи учун ўз ҳиссасини қўшиш ва энг асосийси, билдирилган ишончни оқлашга ваъда беришди.
Учрашув якунида Меҳриддин Абдуллаев томонидан ёшларга эсталик совғалари топширилди.
«Ўзбекнефтгаз» АЖ матбуот хизмати
Изоҳ (0)