Oliy Majlisi Qonunchilik palatasi spikerining o‘rinbosari, “Milliy tiklanish” demokratik partiyasidan prezidentlikka nomzod Alisher Qodirov O‘zbekistonga hurmatsizlik qilganlar uchun sanksiyalar joriy qilish haqida o‘ylab ko‘rish kerakligini ma’lum qildi.
Uinston Cherchill ‘...akillagan laychalarning hammasiga tosh otaversang, manzilingga yetib borishing qiyinlashadi’, deganida Jirinovskiyga o‘xshaganlarni nazarda tutgan bo‘lsa kerak. Cherchillning dono o‘gitiga quloq tutib, bu shaxsning so‘zlariga e’tibor bermasdan o‘tib ketish to‘g‘ri bo‘lar edi, lekin qisqacha fikrimni bildirib qo‘yish zarar qilmaydi, deb o‘yladim:Rossiya Liberal-demokratik partiyasi yetakchisi Vladimir Jirinovskiyning fikricha, Markaziy Osiyo mamlakatlari o‘z xalqini Afg‘onistondagi jangarilar hujumidan himoya qilish uchun Rossiya tarkibiga kirishi kerak bo‘ladi. Siyosatchining so‘zlariga ko‘ra, Rossiya tarkibida Dushanbe, Bishkek, Toshkent, Ashxobod va Chimkent guberniyalari tashkil etilishi lozim.Birinchidan, Jirinovskiyning bu bayonotlari, hatto norasmiy bo‘lsa ham, Rossiyaning xalqaro obro‘siga zarar beradi. Rossiyaning kam sonli hamkor mamlakatlari uchun ham rivojlangan dunyo kabi, Rossiya bosqinchi va ikkiyuzlamachi davlat deya xavotirlanishlariga yo‘l ochadi;
Ikkinchidan, bugungi Rossiya Rus imperiyasini tiklash, boshqa hududlarni qo‘shib olish haqida emas, tarqalib ketmaslik haqida ko‘proq bosh qotiryapti. Shu sababli, Jirinovskiyning bunday aljirashlariga rus rasmiy doiralari birinchi bo‘lib munosabat bildirishlari kerak, deb o‘ylayman;
Uchinchidan, so‘nggi vaqtlarda Rossiyadagi rasmiy doiralar Markaziy Osiyoda mahalliy ruslarga hurmatsizlik qilinayotgani sabab alohida subyektlarga sanksiyalar qo‘llashmoqda. Lekin boshqa millatlarga hurmatsizlik qilayotgan o‘z rasmiylariga nisbatan ovoz ham chiqarmayaptilar. Bu ikkiyuzlamachilik emasmi?
Markaziy Osiyoda yashayotgan rus vatandoshlarimizning mahalliy aholi bilan munosabati buzilishiga aynan shu kabi kaltabin bayonotlar sabab bo‘lmoqda.
Menimcha, biz ham mamlakatimizga hurmatsizlik qilganlar uchun sanksiyalar joriy qilish haqida o‘ylab ko‘rishimiz kerak.
Alisher Qodirov, Qonunchilik palatasi spikerining o‘rinbosari
Avvalroq Alisher Qodirov o‘zbek oilalari farzanlarini rus maktablariga berayotgani sabab bolalar o‘zbek tilini bilmay va milliy o‘ziga xosligini aglamay ulg‘ayayotganidan xavotirda ekanini yozib qoldirgandi.
Oliy Majlis Qonunchilik palatasining 20-aprel kuni o‘tkazilgan navbatdagi majlisida deputatlar “‘O‘zbekiston Respublikasining davlat tili haqida’gi qonuniga o‘zgartish va qo‘shimchalar kiritish to‘g‘risida”gi qonun loyihasini bobma-bob, moddama-modda ko‘rib chiqqan. Alisher Qodirovning so‘zlariga ko‘ra, qonun loyihasi muhokamasida “XDPning sovetcha qarashlari va ‘Milliy tiklanish’ni azaldan jini suymaydiganlar bilan qonunga jiddiy e’tibor bermayotganlarning kayfiyatlari” ustuvorlik qilgan.
Izoh (0)