Tashkent City anjumanlar zalida “Toshkent yoshlar forumi – 2020” doirasida 19-dekabr kuni yoshlar migratsiyasi masalalariga bag‘ishlangan xalqaro konferensiya o‘tkazildi, deya xabar qilmoqda “Kun.uz”.

Inson huquqlari bo‘yicha Milliy markaz direktori Akmal Saidov

Foto: “Daryo”

Tadbirda Oliy Majlis qonunchilik palatasi spikeri o‘rinbosari Akmal Saidov ham chiqish qildi. U mazkur chiqishida pandemiya immigratsiya borasida butun dunyoda yirik muammolarni paydo qilgani va bu jarayonda kuchsiz qatlam – muhojirlar eng ko‘p aziyat chekayotganini ta’kidladi.

Spiker o‘rinbosari shunday paytda migrantlarga yordam ko‘rsatishning muhimligi haqida gapirib, bir necha oy avval o‘zbekistonlik muhojirlarga chet davlatlarining o‘zida yordam ko‘rsatish bo‘yicha ko‘tarilgan chaqiriqlarni tanqid qildi.

“Kimligini aytmay qo‘ya qolay. Bir necha oy avval o‘zbek migrantlariga chet davlatlarining o‘zida yordam ko‘rsatish bo‘yicha chaqiriqlar paydo bo‘ldi. Taklif berishda ham o‘ylash kerak. Xo‘sh, Rossiyada bir kunlik yashash xarajatlari qanchaga tushishini bilasizmi?

Biz migrantlarga bunday paytda vatanga qaytish uchun yetarlicha sharoit qilib berishimiz lozim. Men deputatlardan ijtimoiy tarmoqlar orqali turli xil populistik chaqiriqlardan yiroq bo‘lishlarini so‘rardim”, – degan Akmal Saidov.

Eslatib o‘tamiz, “Milliy tiklanish” demokratik partiyasi Markaziy kengashi raisi Alisher Qodirov bir muddat avval chet eldan o‘zbekistonliklarni vatanga qaytarishni vaqtincha to‘xtatib, ularni turgan mamlakatlarida davolanishlarini moliyalashtirish taklifini bildirgan edi.

“Xorijdan vatandoshlarimizni olib kelishni to‘xtatish, ular turgan mamlakatlarida davolanishlarini moliyalashtirish haqida o‘ylashimiz kerak. Bu birinchi navbatda, o‘sha vatandoshimizning qarindoshlariga, qolaversa, butun O‘zbekistonga yaxshilik bo‘ladi”, – degan siyosatchi.

Ma’lumot uchun, qonunchilik palatasi spikeri o‘rinbosari Akmal Saidov ham mansubligi bo‘yicha “O‘zbekiston milliy tiklanish” partiyasi a’zosi hisoblanadi.

Eslatib o‘tamiz, 2019-yilgi Oliy Majlis Qonunchilik Palatasi deputatligiga saylovning dastlabki natijalariga bag‘ishlangan sessiyasi davomida O‘zbekiston Xalq demokratik partiyasi lideri Ulug‘bek Inoyatov “Milliy tiklanish” demokratik partiyasi lideri Alisher Qodirov deputatlikka populistligi sabab saylana olmaganini aytgan edi. Bunga Alisher Qodirov “Populizm bu xalqqa xizmat qilishdir”, deya javob qaytargan.