“O‘zbekning bolasi o‘zbek qadriyatlari bilan tarbiya ko‘rsin” — Alisher Qodirov ona tilini bilmaydigan “yangi avlod o‘zbeklari” haqida

Oliy Majlis Qonunchilik palatasi spikeri o‘rinbosari, “Milliy tiklanish” partiyasi rahbari Alisher Qodirov o‘zining Telegram’dagi kanaliga o‘zbek oilalari farzanlarini rus maktablariga berayotgani sabab bolalar o‘zbek tilini bilmay va milliy o‘ziga xosligini aglamay ulg‘ayayotganidan xavotirda ekanini yozib qoldirdi.

Deputat Rossiya prezidenti Vladimir Putining 30-mart kuni millatlararo munosabatlar bo‘yicha kengaygan yig‘ilishida aytgan gaplaridan iqtibos keltirdi: “Rossiyada muhojirlarning farzandlari amalda rus tili va madaniyati muhitiga, imkoni boricha rus milliy qadriyatlariga to‘liq singib ketishiga erishish kerak”.

“Biz esa 100 yildan beri rus vatandoshlarimizga o‘zbek tilini o‘rgata olmaymiz. Aksincha, o‘zbeklar farzandini rus tilida ta’lim olishga yo‘naltirayotgani odatiylashib bormoqda. Toshkent shahrida o‘zbek tilida o‘qitilmaydigan maktablar soni ko‘payib ketdi. Achinarlisi, bunday maktablarning 90 foizdan ko‘p o‘quvchilari o‘zbeklardir”, — deb yozadi vitse-spiker.

Uning fikricha, bu qonunchilikdagi xato bilan bog‘liq masala. Qodirovning qayd etishicha, yangi tahrirda ko‘rilayotgan “Davlat tili haqida”gi qonun loyihasining 18-moddasida “O‘zbekistonda yashovchi shaxslar tarbiya va ta’lim olish tilini tanlash huquqiga egadirlar” deb belgilanmoqda. Bu huquq amaldagi qonunda ham bor bo‘lib, faqat ta’lim tiliga tegishli edi, endi tarbiya ham qo‘shilmoqda.

“Bu norma mohiyatan boshqa millat vakili bo‘lgan vatandoshlarimizning ona tilida tarbiya ko‘rish va ta’lim olish huquqini ta’minlashga qaratilgan edi. Buni qarangki, o‘zbek oilalari ‘farzandim rus tilini yaxshi bilsin’ degan niyat bilan bog‘chadan yoki 1-sinfdan boshlab farzandi uchun tamoman begona bo‘lgan tilni tanlashmoqda”, — deya ta’kidladi partiya rahbari.

“Bola shu ikkita shok bilan, rus tilini ‘sudrab’, milliy qadriyat, vatan, ma’naviyat degan so‘zlarga nafrat bilan maktabni bitiradi. Marhamat, o‘zbek yoshlaridan iborat ishchilar guruhi. Bu holatda ularning juda ko‘pi uchun yagona yo‘l Rossiyada qora mehnat bo‘lib qoladi”, — deya qo‘shimcha qiladi deputat.

Shu sababli, uning so‘zlariga ko‘ra, “Milliy tiklanish” partiyasining fraksiyasi ushbu normani “O‘zbekistonda yashovchi shaxslarga o‘z ona tilida tarbiya va ta’lim olish uchun sharoit yaratiladi” shaklida o‘zgartirishni tashabbus qilmoqda.

“Eslataman, Konstitutsiyada O‘zbekistondagi barcha millatlarning tillarini rivojlantirish uchun sharoit yaratishga va’da berilgan. Bu va’da oshig‘i bilan bajarilmoqda, bajarilishi ham kerak. Lekin bag‘rikengligimiz oqibatida o‘zbeklarning yangi avlodi o‘zligini anglamaydigan, ona tilini bilmaydiganlardan iborat bo‘lishiga yo‘l qo‘yib bo‘lmaydi”, — deydi spiker o‘rinbosari.

“O‘zbekning bolasi o‘zbek qadriyatlari bilan tarbiya ko‘rsin, savodini o‘zbek tilida chiqarsin, 7-sinfdan boshlab istagan xorijiy tilni o‘rgansin, bu millat rivoji uchun zarur”, — deya ta’kidladi deputat.

“Boshqa millat vakillari bo‘lgan vatandoshlar ham ona tillarida tarbiya ko‘rsinlar, savod chiqarsinlar, lekin xorijiy tillar bilan bir qatorda, vatan tili sifatida o‘zbek tilini ham o‘rganishlari kerak”, — deya xulosa yasaydi Alisher Qodirov.

Avvalroq Alisher Qodirov reklamalarda hayosizlik va pornografiya bemalol bo‘lib qolgani, OTM tarbiya maskani emasligi talaba faqat bilim olish uchun kelishi lozimligi to‘g‘risida fikr bildirgandi.