Amerika harbiylari mamlakatni tark etgach, “Tolibon” harakati Afg‘onistonning to‘liq mustaqillikka erishganini e’lon qildi, deb yozadi Al Jazeera.
Telekanal muxbiri xabariga ko‘ra, Kobulda “Tolibon” chet el qo‘shinlarining uzil-kesil jo‘nab ketganini bayram qilib, havoga o‘q uzgan.
“Tolibon” vakili Zabihulla Mujohid Afg‘oniston Amerika qo‘shinlari chiqib ketganidan keyin mustaqil bo‘lganini e’lon qildi. “Bugun Afg‘oniston vaqti bilan yarim tunda Amerika qo‘shinlari Kobul aeroportini tark etdi va bizning mamlakatimiz to‘liq mustaqillikka erishdi”, — deb yozdi “Tolibon” vakili Twitter’da.
CNN xabariga qaraganda, “Tolibon” jangarilari Kobulda avtomatik quroldan salyutlar otgan. Shaharda avtomatdan otilgan o‘q ovozlari eshitilib, osmonda havoda iz qoldirib uchayotgan o‘qlar ko‘ringan.
LA Times xabar qilishicha, “Tolibon” amerikaliklarning Afg‘onistondan chiqib ketishini nishonlab, ularning formalarini kiyib ko‘rgan, texnikasini o‘rgangan, qo‘shiq kuylab, havoga o‘q uzgan.
Zabihulla Mujohid AQShning evakuatsiya bo‘yicha operatsiyasi yakunlanganidan keyin “Tolibon” nazorati ostiga o‘tgan Kobul aeroportining uchish qo‘nish yo‘lagida turib: “Afg‘onistonni tabriklayman! Bu g‘alaba barchamizniki”, — deya jurnalistlarga ma’lum qilgan.
Shu bilan birga, Mujohid: “Biz AQSh va butun dunyo bilan yaxshi aloqalarda bo‘lishni istaymiz. Barcha bilan yaxshi diplomatik aloqalar o‘rnatilishini ma’qullaymiz”, — deya qo‘shib qo‘ydi.
“RIA Novosti” yozishicha, “Tolibon” vakili AQSh Afg‘onistonda o‘z maqsadlariga erisha olmagani va mag‘lubiyatga uchraganini ma’lum qildi.
Amerika armiyasi o‘z kontingentini Afg‘onistondan olib chiqishni yakunladi. AQShning Afg‘onistondagi harbiy missiyasi qariyb 19 yil-u 11 oy davom etdi. Amerika qo‘shinlari mamlakatga 2001-yil 11-sentabrda Nyu-York va Vashingtonda teraktlar uyushtirgan “Al-Qoida” bilan kurashish uchun kelgan edi. Bu AQSh tarixidagi eng uzoq davom etgan urush bo‘ldi. Unda 2400 dan ortiq Amerika harbiy xizmatchilari halok bo‘ldi, yana 20 mingdan ortig‘i yaralandi. Ushbu missiya AQShga 1-2 trillion dollarga tushgan.
Izoh (0)