Hindistonning Uttar-Pradesh shtatida noma’lum virus keltirib chiqargan isitma tufayli bir haftada 68 kishi vafot etdi, ulardan 40 nafari bolalar. Bu haqda mahalliy sog‘liqni saqlash boshqarmasi vakillariga tayanib, The Times of India xabar berdi.
Boshqarma ma’lumotlariga ko‘ra, bemorlarning ko‘pchiligida baland harorat, suvsizlanish va qondagi trombotsitlar sonining keskin kamayishi kuzatilgan. Infeksiyaga chalinganlar, shuningdek, denge bezgagiga o‘xshash alomatlar — mushak og‘rig‘i, ko‘ngil aynishi, bosh og‘rig‘i, limfa tugunlarining shishishi haqida xabar bergan.
Denge bezgagining asosiy tashuvchisi chivinlar hisoblanadi. Bu kasallikka qarshi vaksina yo‘q, davolash simptomatik vositalar yordamida amalga oshiriladi.
Noma’lum infeksiya bilan kasallanish bo‘yicha aksariyat holatlar Agra, Mathura, Maynpuri, Eta va Kasganj tumanlarida aniqlangan. Firozobod tumani esa eng ko‘p zarar ko‘rgan (tumanlarning barchasi Hindistonning Uttar-Pradesh shtatida). Sog‘liqni saqlash boshqarmasi o‘tgan bir kun davomida Firozobod tumanida yana 12 bola ushbu kasallikdan vafot etganini, hozirda 72 bola kasal ekanini qayd etdi. Tumanda 1—8-sinf o‘quvchilarining maktabga borishi to‘xtatildi. Cheklovlar 6-sentabrgacha davom etadi.
Firozobodlik shifokorlardan biri Manish Asijaning aytishicha, “tumanlardagi vaziyat xavotirli”. U kasallik tarqalishining sababi sifatida sanitariya va gigiyenaning yo‘qligini ko‘rsatmoqda. Shuningdek, Hindistonda davlat shifoxonalaridagi barcha bemorlar COVID-19 uchun testdan o‘tkazilmoqda, shu paytgacha koronavirusning bu noma’lum isitma bilan birorta bog‘liqligi aniqlanmagan.
Keyinroq shtat kotibining sog‘liqni saqlash masalalari bo‘yicha o‘rinbosari Amit Moxan ushbu noma’lum kasallik denge bezgagi bo‘lishi mumkinligini ma’lum qildi.
“Kasallikning kelib chiqish sabablari haligacha o‘rganilmoqda, ammo simptomlari denge bezgagiga o‘xshaydi. Biz davlat sog‘liqni saqlash tizimining barcha imkoniyatlarini ishga tushirdik”, — dedi u.
2020-yilning dekabrida Hindistonda 300 dan ortiq kishi noma’lum kasallik bilan shifoxonaga yotqizilgan edi. Bir kishi vafot etgan. Keyinchalik ushbu noma’lum kasallikka metallardan zaharlanish sabab bo‘lgani taxmin qilindi.
Izoh (0)