Ижтимоий тармоқларда Тошкент метрополитенида носозлик содир бўлиб, поезд туннел ичида тўхтаб қолгани акс этган видеолар тарқалди. Ҳолат юзасидан «Ўзбекистон темир йўллари» матбуот хизмати изоҳ берди.
Қайд этилишича, 28 август соат 14:35 атрофида «Ойбек» бекатидан «Тошкент» бекатига ҳаракатланаётган электропоезд машинисти ҳаракат таркибида носозликни сезиб, тегишли йўриқномага асосан ҳаракат хавфсизлигини таъминлаш мақсадида электропоездни тўхтатган.
Йўриқномага асосан ортидан келган ҳаракат таркиби йўловчиларни «Ойбек» бекатида туширилиб, ёрдам тариқасида юборилган. Носоз ҳаракат таркиби йўловчилари «Тошкент» бекатига туширилиб, техник кўрикка юборилган.
Носозликни бартараф этиш вақти 9 дақиқани ташкил этган.
Бундан аввал, Тошкент метрополитенининг «Космонавтлар» бекатида шубҳали буюм топилгани ҳақида хабар берилган эди. Йўловчилар поезддан тушириб юборилиб, таркиб текшириш пунктига юборилган.
Қайд этиш жоизки, март ойидан буён Тошкент метрополитени билан боғлиқ шу каби воқеалар тез-тез юз бермоқда. Хусусан, 18 март куни «Олмазор» (Чилонзор йўли) ва «Бекат-1» (Сергели йўли) орасидаги туннелда икки поезд тўқнашганди.
9 апрель куни ижтимоий тармоқларда поезднинг очиқ эшиклар билан ҳаракати туширилган видео тарқалди. Шу билан бирга, метрополитендаги ерости ва ерусти поезд ҳаракатларининг бир нечта бошқа видеолари ҳам ижтимоий тармоқларда кўп бора муҳокама қилинди. 28 апрель куни эса туннелда тўхтаб қолган поезд ҳақидаги видео тарқалди, унда йўловчилар рельслар орқали ҳаракатланиб, бекатга етиб олгани тасвирланган. 13 май куни «Амир Темур хиёбони» бекатида барча йўловчилар тушириб юборилганди.
Изоҳ (0)