Milliy matbuot markazida 25-avgust kuni Maktabgacha ta’lim vazirligi rahbariyati ishtirokida hukumatning 2020-yil 9-martdagi “Bolalarni boshlang‘ich ta’limga majburiy bir yillik tayyorlash tizimini yanada rivojlantirish chora-tadbirlari to‘g‘risida”gi qarori ijrosiga oid masalalar yuzasidan matbuot anjumani bo‘lib o‘tdi. Bu haqda “Daryo” muxbiri xabar bermoqda.
Ta’kidlanishicha, bugungi kunda O‘zbekiston bo‘yicha 669 ming 198 nafar 6 yoshli boladan 515 ming 144 nafari, ya’ni 77 foizi maktabgacha ta’limga qamrab olingan. Ularning 114 ming 286 nafari qisqa muddatli guruhlar, 89 ming 240 nafari boshlang‘ich ta’limga majburiy bir yillik bepul tayyorlov guruhlari, 311 ming 618 nafari esa maktabga tayyorlov guruhlari tarbiyalanuvchilari hisoblanadi.
“Vazirlar Mahkamasining mazkur qarorida maktabgacha ta’lim tashkiloti mavjud bo‘lmagan yoki majburiy bir yillik tayyorlov guruhlari uchun yetarli sharoitlari yo‘q bog‘chalar joylashgan hududdagi olti yoshli bolalar uchun maktablar, kollejlar, ‘Barkamol avlod’ va madaniyat markazlari, bolalar musiqa va san’at maktablari, MFYlar hamda boshqa binolarda tayyorlov guruhlarini tashkil etishga ruxsat berilgan. Shu bois moddiy-texnik baza bosqichma-bosqich shakllantirib borilmoqda.
2019-yilda olti yoshli bolalarning 69,1 foizi maktabgacha ta’limga qamrab olingan. Ayni paytda bu ko‘rsatkich 77 foizni tashkil qiladi, yil yakunigacha esa 87 foizga oshirish rejalashtirilgan. Bu jarayon, albatta, vaqt talab qiladi. 2025-yilgacha to‘liq jalb qilish ko‘zda tutilgan.
Shuningdek, 2030-yilga qadar respublikadagi 3—7 yoshdagi bolalarning 80,8 foizini maktabgacha ta’lim bilan qamrab olish ham rejada bor”, — dedi maktabgacha ta’lim vaziri o‘rinbosari Uzoqboy Begimqulov.
Uning qayd etishicha, MTTga qamrab olingan olti yoshli bolalarni maktab ta’limiga tayyorlash uchun “Ilk qadam” davlat o‘quv dasturi hamda “Ilm yo‘li” variativ o‘quv dasturidan foydalanilmoqda.
Izoh (0)