Chilonzorda kuchli ta’sir qiluvchi dori vositalarini noqonuniy sotayotgan dorixona aniqlanib, jinoyat ishi qo‘zg‘atildi

Toshkentning Chilonzor tumanida kuchli ta’sir qiluvchi dori vositalarini noqonuniy sotayotgan dorixona aniqlandi, deb xabar bermoqda Bosh prokuratura huzuridagi Iqtisodiy jinoyatlarga qarshi kurashish departamenti.

Departamentning Chilonzor tuman bo‘limi tomonidan DXX bilan hamkorlikda o‘tkazilgan tezkor tadbirda, tumandagi “G” MChJga qarashli dorixonaning norasmiy sotuvchisi F.E. xaridorga 2 dona “Regapen”, 1 donadan “Selofen” hamda “Tropikamid” nomli kuchli ta’sir qiluvchi dori vositalarini jami 180 ming so‘mga sotgan vaqtida ushlangan.

Shuningdek, ushbu dorixonadan tegishli hujjatlari bo‘lmagan 114 dona “Regapen”, 107 dona “Selofen”, 92 dona “Zardeks”, 68 dona “Tebantin” va 9 dona “Tropikamid” nomli dori vositalari ashyoviy dalil sifatida olingan.

Mazkur holat yuzasidan Jinoyat kodeksining 186-3-moddasi (tarkibida kuchli ta’sir qiluvchi moddalar mavjud bo‘lgan dori vositalarini retsept bo‘yicha chakana realizatsiya qilish tartibini buzish) bilan jinoyat ishi qo‘zg‘atilib, tergov harakatlari o‘tkazilmoqda.