Миллий матбуот марказида 25 август куни Мактабгача таълим вазирлиги раҳбарияти иштирокида ҳукуматнинг 2020 йил 9 мартдаги «Болаларни бошланғич таълимга мажбурий бир йиллик тайёрлаш тизимини янада ривожлантириш чора-тадбирлари тўғрисида»ги қарори ижросига оид масалалар юзасидан матбуот анжумани бўлиб ўтди. Бу ҳақда «Дарё» мухбири хабар бермоқда.
Таъкидланишича, бугунги кунда Ўзбекистон бўйича 669 минг 198 нафар 6 ёшли боладан 515 минг 144 нафари, яъни 77 фоизи мактабгача таълимга қамраб олинган. Уларнинг 114 минг 286 нафари қисқа муддатли гуруҳлар, 89 минг 240 нафари бошланғич таълимга мажбурий бир йиллик бепул тайёрлов гуруҳлари, 311 минг 618 нафари эса мактабга тайёрлов гуруҳлари тарбияланувчилари ҳисобланади.
«Вазирлар Маҳкамасининг мазкур қарорида мактабгача таълим ташкилоти мавжуд бўлмаган ёки мажбурий бир йиллик тайёрлов гуруҳлари учун етарли шароитлари йўқ боғчалар жойлашган ҳудуддаги олти ёшли болалар учун мактаблар, коллежлар, ‘Баркамол авлод’ ва маданият марказлари, болалар мусиқа ва санъат мактаблари, МФЙлар ҳамда бошқа биноларда тайёрлов гуруҳларини ташкил этишга рухсат берилган. Шу боис моддий-техник база босқичма-босқич шакллантириб борилмоқда.
2019 йилда олти ёшли болаларнинг 69,1 фоизи мактабгача таълимга қамраб олинган. Айни пайтда бу кўрсаткич 77 фоизни ташкил қилади, йил якунигача эса 87 фоизга ошириш режалаштирилган. Бу жараён, албатта, вақт талаб қилади. 2025 йилгача тўлиқ жалб қилиш кўзда тутилган.
Шунингдек, 2030 йилга қадар республикадаги 3—7 ёшдаги болаларнинг 80,8 фоизини мактабгача таълим билан қамраб олиш ҳам режада бор», — деди мактабгача таълим вазири ўринбосари Узоқбой Бегимқулов.
Унинг қайд этишича, МТТга қамраб олинган олти ёшли болаларни мактаб таълимига тайёрлаш учун «Илк қадам» давлат ўқув дастури ҳамда «Илм йўли» вариатив ўқув дастуридан фойдаланилмоқда.
Изоҳ (0)