Namangan viloyati Norin tumanida bir guruh shaxslar pichoqbozlik uyushtirgani aks etgan video tarqaldi. Holat yuzasidan Namangan IIB axborot xizmati ma’lumot berdi.
Qayd etilishicha, 2021-yil 30-iyul kuni soat 12:40 larda Norin tumanida yashovchi, 1992-yilda tug‘ilgan fuqaro B.N. Norin tumanida joylashgan tirik baliqlar sotish do‘koni oldida shu tumanda yashovchi tanishi, 1992-yilda tug‘ilgan fuqaro O.V. bilan o‘rtalaridagi kelishmovchilik sababli avtomashina ichida o‘zaro janjallashib, yonida bo‘lgan oshpichoq bilan chap oyoq boldir sohasiga bir marotaba urib, o‘rtacha og‘ir tan jarohati yetkazgan.
Ushbu holat bo‘yicha Norin tuman IIB huzuridagi TB tomonidan 2021-yil 30-iyul kuni Jinoyat kodeksining 105-moddasi 2-qismi “m” bandi (sovuq qurol sifatida foydalanilishi mumkin bo‘lgan ashyolarni ishlatib, qasddan badanga o‘rtacha og‘ir shikast yetkazish) bilan jinoyat ishi qo‘zg‘atilib, B.N.ga nisbatan qamoqqa olish tarzidagi ehtiyot chorasi qo‘llanilgan.
Jinoyat ishi doirasida mazkur holat ishtirokchilarining qimorga xo‘roz urishtirish bilan shug‘ullanishlari haqidagi ma’lumot mavjud emasligi sababli tergov jarayonida ushbu holat tergov yo‘li bilan tekshirilib, huquqiy baho beriladi.
“Ayrim ijtimoiy tarmoq foydalanuvchilari tomonidan ushbu fuqarolarni qimorbozlar deya ta’riflash uchun, avvalo, isbot va dalil bo‘lmog‘i lozim. Shu o‘rinda xabar tarqatayotganda xabarda berilgan izohlar aniq faktlarga asoslangan ekanligiga ishonch hosil qilgach, ommaga e’lon qilishlarini so‘rab qolamiz”, — deyiladi IIB xabarida.
Bundan avval Qashqadaryoda ikki shaxs ichki ishlar xodimlariga pichoq bilan hujum qilgani, Andijondagi bozorda tengdoshini pichoqlab, uning o‘limiga sababchi bo‘lgan fuqaro 8 yilga qamalgani hamda Jizzaxda ikki kishi pichoqlanishi oqibatida vafot etgani haqida xabar berilgandi.
Izoh (0)