Internetda YPX xodimlarini gadoylarga tenglashtirib, ularni haqorat qilgan shaxs 12 mln so‘m jarimaga tortildi

YPX xodimlarini haqorat qilingan video olib, uni ijtimoiy tarmoqlarda tarqatgan shaxsga chora ko‘rildi, deya xabar bermoqda YHXBB.

Qayd etilishicha, fuqaro avtomobil boshqarish jarayonida o‘zini tasvirga olib, YPX xodimlarini “gadoychilik” qilishda ayblab, ularni sha’niga nomaqbul gaplar aytgan.

“Man hazil qilmoqchi edim. Moskvada bu hazilni yaxshi tushunishadi, bizda ham shunaqa tushunishadi, deb o‘ylab chiqargandim. Hozir o‘zimning ham vijdonim qiynalyapti. Yonimdagi organ xodimlarining ko‘ziga qarolmayapman”, – deydi ayblanuvchi.

Ma’lumot uchun, Ma’muriy javobgarlik to‘g‘risidagi kodeksning 41-moddasiga binoan haqorat qilish, ya’ni shaxsning qadr-qimmatini qasddan kamsitish BHMning 20 barobaridan 40 barobarigacha miqdorda, shuningdek, 202-2-moddasi (shaxsning qadr-qimmati kamsitilishiga yoki uning obro‘sizlantirilishiga olib keladigan yolg‘on axborotni tarqatish, shu jumladan, ommaviy axborot vositalarida, telekommunikatsiya tarmoqlarida yoki internet jahon axborot tarmog‘ida tarqatish) BHMning 50 barobari miqdorida jarima solishga sabab bo‘ladi.

Fuqaro yuqoridagi moddalarda aybdor deb topilib, unga BHMning 50 barobari miqdorida (12 250 000 so‘m) jarima tayinlandi.

Bunda  avval xodimini “mol”, “eshak” deya haqoratlagan qashqadaryolik mansabdor ogohlantirish olgani, “Ichki ishlar vazirligining buyrug‘iga bo‘ysunmaydigan komandir” nomi ostida tarqalgan video yuzasidan rasmiy bayonot berilgani hamda Toshkentda Gentra’ni kiyimsiz boshqarib ketayotgan mast fuqaro javobgarlikka tortilgani haqida xabar berilgandi.