Интернетда ЙПХ ходимларини гадойларга тенглаштириб, уларни ҳақорат қилган шахс 12 млн сўм жаримага тортилди

ЙПХ ходимларини ҳақорат қилинган видео олиб, уни ижтимоий тармоқларда тарқатган шахсга чора кўрилди, дея хабар бермоқда ЙҲХББ.

Қайд этилишича, фуқаро автомобиль бошқариш жараёнида ўзини тасвирга олиб, ЙПХ ходимларини «гадойчилик» қилишда айблаб, уларни шаънига номақбул гаплар айтган.

«Ман ҳазил қилмоқчи эдим. Москвада бу ҳазилни яхши тушунишади, бизда ҳам шунақа тушунишади, деб ўйлаб чиқаргандим. Ҳозир ўзимнинг ҳам виждоним қийналяпти. Ёнимдаги орган ходимларининг кўзига қаролмаяпман», – дейди айбланувчи.

Маълумот учун, Маъмурий жавобгарлик тўғрисидаги кодекснинг 41-моддасига биноан ҳақорат қилиш, яъни шахснинг қадр-қимматини қасддан камситиш БҲМнинг 20 баробаридан 40 баробаригача миқдорда, шунингдек, 202-2-моддаси (шахснинг қадр-қиммати камситилишига ёки унинг обрўсизлантирилишига олиб келадиган ёлғон ахборотни тарқатиш, шу жумладан, оммавий ахборот воситаларида, телекоммуникация тармоқларида ёки интернет жаҳон ахборот тармоғида тарқатиш) БҲМнинг 50 баробари миқдорида жарима солишга сабаб бўлади.

Фуқаро юқоридаги моддаларда айбдор деб топилиб, унга БҲМнинг 50 баробари миқдорида (12 250 000 сўм) жарима тайинланди.

Бунда  аввал ходимини «мол», «эшак» дея ҳақоратлаган қашқадарёлик мансабдор огоҳлантириш олгани, «Ички ишлар вазирлигининг буйруғига бўйсунмайдиган командир» номи остида тарқалган видео юзасидан расмий баёнот берилгани ҳамда Тошкентда Gentra’ни кийимсиз бошқариб кетаётган маст фуқаро жавобгарликка тортилгани ҳақида хабар берилганди.