O‘zbekistonda yil oxirigacha umumiy qiymati 9,7 million dollar xususiy investitsiyalarni jalb qilgan holda 8 ta yangi zamonaviy kinoteatr ochiladi. Bu haqda Kinematografiya agentligi bosh direktori Firdavs Abduxoliqov hisobotidan ma’lum bo‘ldi.
Kinoteatrlar Toshkent, Samarqand, Buxoro va Urganch shaharlarida ochiladi. Bu 134 ta yangi ish o‘rni yaratish imkonini beradi.
Bundan tashqari, videokontentni ko‘rish bo‘yicha milliy striming-platforma yaratish loyihasi ishlab chiqiladi.
Madaniyat vazirligi va Yoshlar ishlari agentligiga DCP Digital Cinema Package) formatidagi video kontentni namoyish qilish uchun madaniyat markazlari, teatrlar va yoshlar saroylarini texnik uskunalar bilan jihozlash vazifasi topshirilgan.
Eslatib o‘tamiz, 2021-yilning aprelida O‘zbekiston Prezidentining “Kino san’ati va sanoatini yangi bosqichga olib chiqish, sohani davlat tomonidan qo‘llab-quvvatlash tizimini yanada takomillashtirish to‘g‘risida”gi farmoni bilan kinoteatrlar tarmog‘ini rivojlantirish tartibi tasdiqlandi.
Unga ko‘ra, Qoraqalpog‘iston Respublikasi va viloyatlarning har bir tumanida (shahrida) tarkibida jami o‘rindiqlar soni 250 tadan va kinozallari soni 3 tadan kam bo‘lmagan savdo-ko‘ngilochar komplekslarini qurish uchun tadbirkorlik subyektlariga qishloq xo‘jaligiga mo‘ljallanmagan 25 sotix yer maydonlari bepul ajratiladi.
2021-yil 1-iyuldan boshlab yangi quriladigan savdo maydoni 15 ming kvadrat metrdan ortiq savdo-ko‘ngilochar komplekslarida jami o‘rindiqlar soni 300 tadan va kinozallari soni 4 tadan kam bo‘lmagan kinoteatr tashkil etish majburiy hisoblanadi.
2024-yil 1-yanvarga qadar kinoteatr (kinozal)lar mualliflik huquqini himoya qilish imkonini beruvchi raqamli (DCP va undan yuqori formatdagi) kino namoyishi qurilmalari bilan jihozlangan taqdirda ularni xarid qilish bilan bog‘liq xarajatlarining 50 foizi, biroq bitta qurilma uchun 50 million so‘mdan ortiq bo‘lmagan miqdorda davlat budjeti mablag‘lari hisobidan qoplab beriladi.
Izoh (0)