Jizzaxda sifat sertifikatiga ega bo‘lmagan dori vositalarini sotishga uringan talaba qo‘lga olindi. Bu haqda “Yoshlar” telekanalining “Yangi davr” ko‘rsatuvida ma’lum qilindi.
20-avgust kuni Bosh prokuratura huzuridagi Iqtisodiy jinoyatlarga qarshi kurashish departamenti Jizzax viloyati boshqarmasi tomonidan tezkor tadbir o‘tkazilgan. Tadbir davomida Qarshi shahrida yashovchi 19 yoshli fuqaro Respublika shoshilinch tibbiy yordam ilmiy markazi Jizzax filiali atrofida fuqarolardan biriga pandemiya davrida talab yuqori bo‘lgan dori vositalarini noqonuniy sotishga uringani aniqlangan.
U 40 quti “Remdesivir” dori vositasining har birini 650 ming so‘mdan hisoblab, 26 million so‘mga, shuningdek, 5 dona qutida “Trimetabol” dori vositasini 130 so‘mdan hisoblab, 650 ming so‘mga sotgan vaqtida ushlangan.
Ma’lum bo‘lishicha, Toshkent pediatriya tibbiyot institutining 1-bosqich talabasi bo‘lgan ushbu yigit mijoz bilan internet orqali tanishgan. Hozirda holat yuzasidan tergovga qadar tekshiruv harakatlari olib borilmoqda.
Avvalroq Toshkent va Sirdaryo viloyatlarida talab yuqori bo‘lgan dori vositalarini qimmat narxda sotishga uringan shaxslar qo‘lga olingani to‘g‘risida xabar berilgandi.
Mavzuga doir:
- Andijonda 650 mln so‘mlik sifati kafolatlanmagan va iste’molga yaroqsiz dori vositalari yo‘q qilindi
- Yunusobodda 100 dona qalbaki “Remdesivir” dorisini 4 700 AQSh dollariga sotayotgan shaxslar qo‘lga olindi
- Yakkasaroyda noqonuniy ravishda 76,8 mln so‘mga “Remdesivir” dorisini sotayotgan shaxslar qo‘lga olindi
Izoh (0)