Namanganda “Kelajak liderlari” klubining taqdimot marosimi bo‘lib o‘tdi. Bu haqda “Daryo” muxbiri Azizbek Abduvaliyev xabar bermoqda.
Prezident huzuridagi Davlat xizmatini rivojlantirish agentligi tomonidan joylarda salohiyatli yosh yetakchilar qatlamini shakllantirish maqsadida agentlik hududiy filiallari qoshida 20 yoshdan 35 yoshgacha bo‘lgan yigit-qizlar uchun “Kelajak liderlari” klubini tashkil etish bo‘yicha tanlov e’lon qilingandi.
Mazkur klubni tashkil etishdan ko‘zlangan maqsad davlat xizmati uchun yangi avlod kadrlarini shakllantirish, yoshlar, xususan, xotin-qizlarni davlat xizmatiga keng jalb etish, istiqbolli kadrlardan rahbarlik lavozimlariga zaxira shakllantirishdan iborat bo‘ldi.
Namangan viloyatida “Kelajak liderlari” klubiga a’zolik uchun e’lon qilingan tanlovga 500 ga yaqin hujjat kelib tushdi. Saralash esa to‘rt bosqichda amalga oshirildi. Birinchi bosqichda hujjatlar nizom talablariga muvofiq saralab olindi. Ikkinchi bosqichda nomzodlarning bilimlarini baholash bo‘yicha test sinovlari o‘tkazildi. Uchinchi bosqichda “Xalqni sevadigan davlat xizmatchisi” mavzusida esse yozish talab etildi. Tanlovning to‘rtinchi bosqichida esa nomzodlar bilan suhbat uyushtirilib, amaliy ko‘nikma va sifatlari baholandi.
Sinov natijalari 100 ballik mezonda baholanib, umumiy ko‘rsatkichi yuqori bo‘lgan 50 nafar nomzod klub a’zoligiga qabul qilindi. Ularning chorak qismi talabalar, qariyb 15 foizi esa xotin-qizlardan iborat.
Javlonbek Abdullayevning yoshi 25 da, Xalq deputatlari Kosonsoy tuman kengashining deputati. Saylangan okrugida 8 mingdan ortiq aholi yashaydi. Aytishicha, oxirgi ikki yilda ulardan 500 ga yaqin murojaat kelib tushgan, bundan 380 tasi ijobiy yechim topgan.
“Forobiyning ‘Fozil odamlar shahri’ asarida ta’kidlanganidek, har kim o‘z ishini sidqidildan bajarsa, shunda jamiyat ham rivojlanadi. Aynan ushbu fikr hayotda men uchun shior. Jismoniy imkoniyatlarim biroz cheklangan bo‘lishiga qaramay, hamisha o‘z missiyamni ortig‘i bilan bajarishga harakat qilaman. Shu bois klub a’zolari safiga kirganimdan mamnunman”, — deydi Javlonbek.
Davlat xizmatini rivojlantirish agentligi Namangan filiali rahbarining o‘rinbosari Ibrohim Hojiyevning aytishicha, klub a’zolari uchun 6 oy davomida o‘quv-seminarlar tashkil etiladi va boshqaruv ko‘nikmalari shakllantiriladi. Eng yuqori kredit-ball to‘plagan a’zolar “Hokim bilan bir kun”, “Davlat fuqarolik xizmatchisining dublyori”, “Davlat xizmatini rivojlantirish agentligida bir kun” kabi loyihalarda ishtirok etadi, amaliyot o‘tash uchun davlat organlari va tashkilotlari rahbarlariga biriktiriladi.
“Faol a’zolar Davlat boshqaruv akademiyasining ‘Kelajak liderlari‘ o‘quv kursiga yuborilishi, yosh istiqbolli kadrlar sifatida rahbarlik lavozimlariga zaxiraga olinishi, yuqori darajadagi davlat tadbirlarida ishtirok etishi, shuningdek, malaka oshirish uchun xorijga yuborilishi ko‘zda tutilmoqda”, — deydi Ibrohim Hojiyev.
“Kelajak liderlari” klubining taqdimot marosimida viloyat hokimi Shavkat Abdurazzoqov, Davlat xizmatini rivojlantirish agentligi departament mudiri Bahodir Mirusmonov ishtirok etdi.
Klub a’zolariga buni tasdiqlovchi ko‘krak nishonlari va kitoblar taqdim etildi.
Izoh (0)