24-avgust kuni Toshkent davlat agrar universitetida viloyatda bo‘shab qolgan o‘ringa Oliy Majlis Senati a’zosi saylovini o‘tkazish bo‘yicha qo‘shma majlis o‘tkazildi, deb xabar beradi Toshkent viloyati hokimligi matbuot xizmati.
Qo‘shma majlisda Senat a’zoligiga Toshkent viloyati hokimi Davron Hidoyatov nomzodi ilgari surilib, yashirin ovoz berish jarayonlari o‘tkazilgan.
Sanoq komissiyasi xulosasiga ko‘ra, qo‘shma majlisda 535 ta deputat ishtirok etib, ovoz berish jarayonlarida 531 kishi qatnashgan. Shundan 4 ta saylov byulleteni haqiqiy emas deb topilgan va 9 ta byulletendan foydalanilmagan.
Ovoz berishda ishtirok etgan deputatlarning 518 nafari Davron Hidoyatovni yoqlab ovoz bergan. Shunday qilib, viloyat hokimi mutlaq ko‘pchilik ovoz bilan Oliy Majlis Senati a’zosi etib saylangan.
“Qo‘shma yig‘ilishda Davron Hidoyatov so‘zga chiqib, bildirilgan ishonch uchun xalq vakillariga minnatdorlik bildirdi”, — deyiladi xabarda.
Eslatib o‘tamiz, Davron Hidoyatov Prezidentning 30-yanvardagi farmoni bilan lavozimidan ozod etilgan Toshkent viloyati hokimi Rustam Xolmatovning o‘rniga viloyat hokimi vazifasini bajaruvchi etib tayinlangan edi. Tayinlovga qadar u Toshkent shahar hokimining arxitektura, kapital qurilish va kommunikatsiyalarni rivojlantirish masalalari bo‘yicha birinchi o‘rinbosari lavozimida faoliyat yuritgan.
Mavzuga doir:
2009-yildan 2012-yilgacha GM Uzbekistan kompaniyasining moliya bo‘yicha ijrochi direktori, 2012-yildan 2014-yilgacha MAN Auto-Uzbekistan QK bosh direktori lavozimlarida xizmat qilgan.
2014—2017-yillarda O‘zbekiston Xususiylashtirish, monopoliyadan chiqarish va raqobatni kuchaytirish davlat qo‘mitasi raisi, 2017—2018-yillarda Chilonzor tumani hokimi lavozimida faoliyat yuritgan.
Izoh (0)