Namanganda fuqaroning o‘qishini ko‘chirib berishni va’da qilgan talaba va uning sheriklari qo‘lga olindi, deb xabar beradi Bosh prokuratura huzuridagi departament.
Ma’lum qilinishicha, departamentning Yangiqo‘rg‘on tumani bo‘limi tomonidan DXXning Namangan viloyati boshqarmasi bilan hamkorlikda tezkor tadbir o‘tkazilgan. Tadbir davomida Namangan davlat universiteti talabasi A.Q. fuqaro A.ning o‘qishini O‘sh davlat universitetidan o‘zi ta’lim olayotgan universitetga vakolatli tanishlari orqali ko‘chirib berishni va’da qilgani aniqlangan. Buning evaziga u 1000 dollar va 5,3 million so‘mni olgan vaqtida ashyoviy dalillar bilan ushlangan.
Shuningdek, A.Q.ning ko‘rsatuviga asosan davom etgan tadbirlarda universitet o‘qituvchilari M.A. va B.A. ushbu pullarni olgan vaqtida ashyoviy dalillar bilan ushlangan.
Mazkur holat yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq Buxoro tibbiyot institutiga o‘qishga kiritish evaziga fuqarodan 5600 dollar olgan andijonlik yigit qo‘lga olingani, Andijonda 3 ming dollar evaziga talabaning o‘qishini Toshkent davlat yuridik universitetiga ko‘chirib bermoqchi bo‘lgan shaxs ushlangani to‘g‘risida xabar berilgandi.
Izoh (0)