Sankt-Peterburgdagi Frunze tumanida o‘zbekistonlik to‘rt nafar muhojir Sofiya sabzavotlar bazasidagi janjaldan so‘ng politsiya idorasiga olib kelindi, deb xabar beradi “78.ru”.
Nashrning ma’lum qilishicha, 22-avgust kuni soat 15:37 da politsiyaning navbatchilik qismiga Sofiya sabzavot bazasida o‘n kishi janjallashayotgani haqida ma’lumot kelib tushgan. Voqea joyiga yetib kelgan politsiya ommaviy janjal bo‘lmaganini aniqlagan.
Ta’kidlanishicha, mojaro ikki erkak o‘rtasida sodir bo‘lgan, qolganlar esa ularni ajratishga harakat qilgan.
Shundan so‘ng voqeaga aloqador sabzavot bazasida turli yumushlar bilan shug‘ullanuvchi to‘rt nafar O‘zbekiston fuqarosi ichki ishlar bo‘limiga olib kelingan. Ularning barchasi ma’muriy javobgarlikka tortilgan.
Avvalroq Moskvadagi ommaviy mushtlashuvda qatnashgan muhojirlarning 46 nafari Rossiyadan deportatsiya qilingani, Rossiyaning Primorsk o‘lkasida ish beruvchi tomonidan pasportlari olib qo‘yilgan o‘zbekistonliklarga yordam berilgani, Tashqi mehnat migratsiyasi agentligi Moskvadagi ommaviy mushtlashuvlar bo‘yicha Rossiyadagi o‘zbekistonliklarga murojaat bilan chiqqani to‘g‘risida xabar berilgandi.
Izoh (0)