Toshkent shahrining Yakkasaroy tumanida ayoli bilan janjallashib qolgan mast erkak uni tartibga chaqirmoqchi bo‘lgan ichki ishlar xodimiga tashlanib qoldi, deb xabar beradi poytaxt IIBB axborot xizmati.
Ma’lum qilinishicha, erkak mazkur voqea sodir bo‘lgan kuni rafiqasi bilan kafeda ovqatlanayotgan bo‘lgan. Ular o‘rtasida mojaro yuzaga kelgan va er xotinini bir necha marta urgan. Tashqariga qochib chiqqan ayol shu atrofda bo‘lgan ichki ishlar xodimidan yordam so‘ragan. Bundan jahli chiqqan er uchastka inspektoriga singan shisha bo‘lagi bilan tashlangan.
Sodir bo‘layotgan voqeadan xabar topgan Milliy gvardiya xodimi fuqaroni tartibga chaqirishga uringan, biroq mast holda bo‘lgan erkak uning yuziga shisha bo‘lagi bilan jarohat yetkazgan. Fuqaroning qarshiliklariga qaramay, yordamga yetib kelgan Milliy gvardiya xodimlari uni ichki ishlar organlariga topshirgan.
Aniqlanishicha, qonunbuzar erkak bundan oldin ham bir necha marta sudlanib, jazoni o‘tab chiqqan.
Mazkur holat yuzasidan T.A.ga nisbatan Jinoyat kodeksining 277-moddasi (bezorilik) 3-qismi “g” bandi bilan jinoyat ishi qo‘zg‘atilgan. Hozirda qonunbuzarga nisbatan qamoqqa olish ehtiyot chorasi qo‘llanilgan.
Avvalroq Toshkentda garajining buzilishiga qarshilik ko‘rsatgan ayolga qo‘pol munosabatda bo‘lgan IIB xodimiga xizmat tekshiruvi tayinlangani, Namanganda fuqaro IIB xodimi bilan janjallashib, uning xizmat kiyimidagi tugmalarni uzib tashlagani to‘g‘risida xabar berilgandi.
Izoh (0)