Наманганда вазир ва ҳокимликка даъвогар ёш лидерлар сараланди

Наманганда «Келажак лидерлари» клубининг тақдимот маросими бўлиб ўтди. Бу ҳақда «Дарё» мухбири Азизбек Абдувалиев хабар бермоқда.

Президент ҳузуридаги Давлат хизматини ривожлантириш агентлиги томонидан жойларда салоҳиятли ёш етакчилар қатламини шакллантириш мақсадида агентлик ҳудудий филиаллари қошида 20 ёшдан 35 ёшгача бўлган йигит-қизлар учун «Келажак лидерлари» клубини ташкил этиш бўйича танлов эълон қилинганди.

Мазкур клубни ташкил этишдан кўзланган мақсад давлат хизмати учун янги авлод кадрларини шакллантириш, ёшлар, хусусан, хотин-қизларни давлат хизматига кенг жалб этиш, истиқболли кадрлардан раҳбарлик лавозимларига захира шакллантиришдан иборат бўлди.

Наманган вилоятида «Келажак лидерлари» клубига аъзолик учун эълон қилинган танловга 500 га яқин ҳужжат келиб тушди. Саралаш эса тўрт босқичда амалга оширилди. Биринчи босқичда ҳужжатлар низом талабларига мувофиқ саралаб олинди. Иккинчи босқичда номзодларнинг билимларини баҳолаш бўйича тест синовлари ўтказилди. Учинчи босқичда «Халқни севадиган давлат хизматчиси» мавзусида эссе ёзиш талаб этилди. Танловнинг тўртинчи босқичида эса номзодлар билан суҳбат уюштирилиб, амалий кўникма ва сифатлари баҳоланди.

Синов натижалари 100 баллик мезонда баҳоланиб, умумий кўрсаткичи юқори бўлган 50 нафар номзод клуб аъзолигига қабул қилинди. Уларнинг чорак қисми талабалар, қарийб 15 фоизи эса хотин-қизлардан иборат.

Жавлонбек Абдуллаевнинг ёши 25 да, Халқ депутатлари Косонсой туман кенгашининг депутати. Сайланган округида 8 мингдан ортиқ аҳоли яшайди. Айтишича, охирги икки йилда улардан 500 га яқин мурожаат келиб тушган, бундан 380 таси ижобий ечим топган.

«Форобийнинг ‘Фозил одамлар шаҳри’ асарида таъкидланганидек, ҳар ким ўз ишини сидқидилдан бажарса, шунда жамият ҳам ривожланади. Айнан ушбу фикр ҳаётда мен учун шиор. Жисмоний имкониятларим бироз чекланган бўлишига қарамай, ҳамиша ўз миссиямни ортиғи билан бажаришга ҳаракат қиламан. Шу боис клуб аъзолари сафига кирганимдан мамнунман», — дейди Жавлонбек.

Давлат хизматини ривожлантириш агентлиги Наманган филиали раҳбарининг ўринбосари Иброҳим Ҳожиевнинг айтишича, клуб аъзолари учун 6 ой давомида ўқув-семинарлар ташкил этилади ва бошқарув кўникмалари шакллантирилади. Энг юқори кредит-балл тўплаган аъзолар «Ҳоким билан бир кун», «Давлат фуқаролик хизматчисининг дублёри», «Давлат хизматини ривожлантириш агентлигида бир кун» каби лойиҳаларда иштирок этади, амалиёт ўташ учун давлат органлари ва ташкилотлари раҳбарларига бириктирилади.

«Фаол аъзолар Давлат бошқарув академиясининг ‘Келажак лидерлари’ ўқув курсига юборилиши, ёш истиқболли кадрлар сифатида раҳбарлик лавозимларига захирага олиниши, юқори даражадаги давлат тадбирларида иштирок этиши, шунингдек, малака ошириш учун хорижга юборилиши кўзда тутилмоқда», — дейди Иброҳим Ҳожиев.

«Келажак лидерлари» клубининг тақдимот маросимида вилоят ҳокими Шавкат Абдураззоқов, Давлат хизматини ривожлантириш агентлиги департамент мудири Баҳодир Мирусмонов иштирок этди.

Клуб аъзоларига буни тасдиқловчи кўкрак нишонлари ва китоблар тақдим этилди.