O‘zbekistonlik 38 nafar o‘quvchi Bo‘lajak liderlar almashinuvi dasturi doirasida 2006-yildan beri birinchi marta Amerikaga yuboriladi
O‘zbekistonlik 38 nafar o‘quvchi FLEX (Bo‘lajak liderlar almashinuvi) dasturi doirasida Amerika Qo‘shma Shtatlariga bir yilga ta’lim olish uchun yuboriladi. Bu haqda 4-avgust kuni bo‘lib o‘tgan FLEX—2021 almashinuv dasturi g‘oliblarini AQShga kuzatishga bag‘ishlangan tadbirda ma’lum qilindi, deya xabar bermoqda “Daryo” muxbiri Musulmonbek Ibrohimov.
Tadbirda ta’kidlanishicha, O‘zbekistondan 2006-yildan buyon FLEX (Bo‘lajak liderlar almashinuvi) dasturi bo‘yicha 15 yildan keyin yana AQShga maktab o‘quvchilari yuborilmoqda. Maktab o‘quvchilari bo‘lgan bu ishtirokchilar 2021/2022-o‘quv yili davomida Amerika maktablarida o‘qiydi hamda Amerikadagi mezbon oilalar bilan birga yashaydi.
Anjuman davomida “Daryo” muxbirining nima sababdan 15 yil FLEX dasturi bo‘yicha O‘zbekistondan o‘quvchilar AQShga o‘qishga yuborilmay qo‘yganligi haqidagi savolga AQShning O‘zbekistondagi elchisi Daniyel Rozenblyum javob berdi. Elchining aytishicha, bunga ikki mamlakat o‘rtasidagi ba’zi bir kelishmovchiliklar sabab bo‘lgan.
“Ikki xalq o‘rtasida ba’zi bir holatlarda kelishmovchiliklar bo‘lgan. Lekin keyingi yillarda, ayniqsa, to‘rt yildan buyon munosabatlarimiz yaxshi darajaga ko‘tarildi. Shu bois bu dasturni yana qaytadan amalga oshirishga muvoffaq bo‘ldik. Ungacha O‘zbekiston va AQSh munosabatlarida qandaydir kelishmoqchiliklar bo‘lgan. Xususan, almashinuv dasturlarini yo‘lga qo‘yish bo‘yicha ham. Lekin keyingi yillarda dastur yaxshi amalga oshirilmoqda”, — dedi elchi Daniyel Rozenblyum.
Janob elchining qo‘shimcha qilishicha, AQShdan talabalar, olimlar, ingliz tili o‘qituvchilari va boshqa mutaxassislar ham O‘zbekistonga kelib, maktablarda, universitetlarda, boshqa bir muassasalarda ishlamoqda, dars berib, ta’lim olmoqda.
FLEX dasturi 1993—1994-yillarda sobiq senator Bill Bredli tomonidan AQSh va Yevrosiyo mamlakatlari o‘rtasida uzoq muddatli tinchlik va o‘zaro tushunishni ta’minlash maqsadida tuzilgan va yo‘lga qo‘yilgan. Dastur xorijlik yoshlarga AQSh va amerikaliklar bilan bevosita tanishish imkonini beradi, shu bilan birga u Yevrosiyo madaniyati va mamlakatlarini amerikaliklarga tanishtiradi. Bugunga qadar 22 mamlakatdan kelgan 29 mingdan ortiq o‘quvchi FLEX dasturida ishtirok etgan.
Xalqaro ta’lim bo‘yicha 1993-yildan buyon Amerika Kengashlari FLEX dasturiga O‘zbekistondan 947 nafar ishtirokchini yuborgan. Qo‘shma Shtatlarda FLEX ishtirokchilari yetakchilik ko‘nikmalariga ega bo‘ladi, Amerika jamiyati va qadriyatlari bilan tanishadi, amerikaliklarga o‘z mamlakatlari va madaniyatlarini o‘rgatadi. FLEX talabalari AQSh jamiyatida jamoat ishlarida ishtirok etadi va o‘z mamlakatlari vakili vazifasini bajaradi. Ularning ko‘pchiligi dastur davomida orttirgan mahorat va g‘oyalardan foydalangan holda o‘z mamlakatlarida innovatsion loyihalarni ishlab chiqadi va amalga oshiradi.
FLEX — katta tanlov va o‘quvchilarning o‘qishdagi muvaffaqiyatiga asoslanib, AQSh Davlat departamenti moliyalashtiradigan dastur bo‘lib, u Armaniston, Ozarbayjon, Chexiya, Estoniya, Gruziya, Gretsiya, Vengriya, Qozog‘iston, Qirg‘iziston, Latviya, Litva, Moldova, Mo‘g‘uliston, Chernogoriya, Polsha, Ruminiya, Serbiya, Slovakiya, Tojikiston, Turkmaniston, Ukraina va O‘zbekistonda faoliyat olib boradi. Har yili 35 mingdan ortiq o‘quvchi FLEX stipendiyasini olish uchun bir nechta test sinovlarida qatnashadi, bu ularga bir o‘quv yilida Qo‘shma Shtatlardagi mezbon oilada yashash hamda AQSh maktablarida o‘qish imkonini beradi.
