24-avgust kuni O‘zbekiston tashqi ishlar vaziri Abdulaziz Komilov Shveysariyaning favqulodda va muxtor elchisi etib tayinlangan Konstantin Obolenskiyni qabul qildi. Bu haqda TIV matbuot xizmati xabar berdi.
Ishonch yorliqlarining nusxalarini qabul qilgan Abdulaziz Komilov elchini O‘zbekistonda faoliyat boshlagani bilan tabriklagan va unga yuqori va mas’uliyatli lavozimda muvaffaqiyatlar tilagan.
Suhbat chog‘ida ikki tomonlama hamkorlikni kengaytirish, xususan, tashqi ishlar vazirliklari o‘rtasida siyosiy maslahatlashuvlar o‘tkazish, savdo-iqtisodiy va investitsiyaviy aloqalarni jadallashtirish orqali munosabatlarni rivojlantirishdan ikki tomon ham birdek manfaatdor ekanligi qayd etilgan.
“Afg‘onistondagi mavjud holatni hisobga olgan holda mintaqadagi vaziyat, shu jumladan, Shveysariya fuqarolarini bu mamlakatdan evakuatsiya masalalari yuzasidan fikr almashildi”, — deyiladi xabarda.
Avvalroq O‘zbekistonning Iroqdagi ilk elchisi mamlakat prezidentiga ishonch yorliqlarini topshirgani, O‘zbekiston Dominika bilan diplomatik munosabatlar o‘rnatgani to‘g‘risida xabar berilgandi.
Izoh (0)